Edhe pse Bashkimi Demokratik për Integrim (BDI) nuk e mbështeti, shumica parlamentare arriti të sigurojë 81 vota për miratimin e ndryshimeve në Ligjin për kundërvajtje, duke i hapur rrugë nisjes së sistemit “Safe City” nga 1 shkurti.
Pro votuan edhe deputetët e pavarur Ilir Demiri, i cili u shkëput nga Aleanca për Shqiptarët e Ziadin Selës, si dhe Bejxhan Iljas nga Partia e Turqve, e cila së fundmi u largua nga Fronti Europian. Në total, bashkë me votat e partisë Levica, u siguruan 81 vota “për”. Kundër votuan 19 deputetë, ndërsa nuk pati asnjë të përmbajtur.
Shoferët në Shkup, Kumanovë dhe Tetovë do të duhet të kenë kujdes të shtuar për respektimin e shpejtësisë gjatë drejtimit të automjeteve, pasi nga 1 shkurti do të fillojë zyrtarisht funksionimi i sistemit “Safe City”.
Ndryshimet ligjore u votuan nga shumica qeverisëse, pavarësisht se e gjithë opozita u deklarua kundër, me përjashtim të deputetëve të Levicës. Edhe pse BDI në një takim të mëparshëm të liderëve kishte tërhequr mbështetjen për këto ndryshime ligjore, pushteti arriti të sigurojë shumicën prej dy të tretave, duke mundësuar që projekti “Safe City” të nisë sipas planit të qeverisë. (INA)
