Aleanca për Shqiptarët shpreh qëndrimin e saj kritik ndaj ndryshimeve të miratuara në Ligjin për Kundërvajtje, në të cilin përfshihet edhe projekti “Safe City”, duke vlerësuar se zbatimi aktual i këtij projekti ngre shqetësime serioze juridike, sociale dhe kushtetuese.
Zbatimi selektiv i projektit “Safe City” vetëm në Shkup, Kumanovë dhe Tetovë është i padrejtë dhe diskriminues. Një projekt që pretendohet se rrit sigurinë publike duhet të zbatohet në mënyrë të barabartë në të gjithë territorin e shtetit, e jo në mënyrë të pjesshme dhe selektive.
ASH konstaton se nuk po zbatohet Ligji për përdorimin e gjuhëve, veçanërisht në komunikimin zyrtar me qytetarët. Njoftimet dhe sanksionet që burojnë nga projekti “Safe City” nuk ofrohen në mënyrë të barabartë në gjuhën shqipe, çka përbën shkelje të drejtpërdrejtë të të drejtave gjuhësore të qytetarëve shqiptarë dhe është e papranueshme në një shtet multietnik.
Kërkojmë rishikim të lartësisë së dënimeve dhe të pragut të tolerancës. Siguria në komunikacion është e domosdoshme, por ajo nuk mund të arrihet përmes gjobave disproporcionale që rëndojnë padrejtësisht mbi qytetarët dhe cenojnë mirëqenien e tyre ekonomike.
Pa asnjë llogari për mirëqenien e qytetarëve, dhe pa i adresuar këto mangësi serioze ligjore dhe kushtetuese, deputetët e VMRO-DPMNE-së, VLEN-it, ZNAM-it, Levicës, kanë votuar që nga 1 shkurti të hyjnë në fuqi gjobat që burojnë nga sistemi “Safe City”.
Aleanca për Shqiptarët kërkon nga institucionet kompetente që urgjentisht të hapin debat publik, të korrigjojnë shkeljet evidente dhe të sigurojnë që çdo projekt i tillë të jetë në përputhje me Kushtetutën, ligjin dhe parimin e barazisë.
Nisur nga kjo, Aleanca për Shqiptarët gjatë ditës së hënë do ta ankimojë Ligjin në Gjykatën Kushtetuese.
Një rast i ngjashëm, që krijon precedent të qartë juridik, është ai i Ligjit për fëmijën e tretë, të cilin Gjykata Kushtetuese e shpalli antikushtetues. Atëkohë, qeveria e Nikolla Gruevskit synonte ta zbatonte këtë masë vetëm në disa qytete të caktuara, kryesisht me popullsi maqedonase, me arsyetimin e mungesës së natalitetit pozitiv. Gjykata Kushtetuese vlerësoi se një qasje e tillë selektive cenon parimin e barazisë dhe bie ndesh me Kushtetutën. Në këtë frymë, besojmë se edhe në rastin e “Safe City”, Gjykata Kushtetuese do të udhëhiqet nga dispozitat kushtetuese dhe do të abrogojë ndryshimet ligjore që janë në kundërshtim të drejtpërdrejtë me Kushtetutën e vendit.
