Spitali klinik i Tetovës ka marrë reakreditim trevjeçar nga Agjencia për akreditim, një vlerësim ky i rëndësishëm që konfirmon standardet e larta profesionale dhe cilësinë e shërbimeve shëndetësore që ofrohen.
Ky akreditim përbën një arritje të veçantë, pasi për herë të parë institucioni në fjalë fiton akreditim me kohëzgjatje prej tre vitesh, duke reflektuar përkushtimin, përgjegjësinë dhe punën e vazhdueshme të të gjithë stafit.
Drejtori i Spitalit klinik, dr.spec. Erzen Elezi ka thënë se ky sukses është rezultat i një pune ekipore, planifikimit strategjik dhe përkushtimit të vazhdueshëm ndaj standardeve profesionale dhe sigurisë së pacientëve.
“Ky vlerësim është dëshmi e punës profesionale dhe e angazhimit tonë për përmirësim të vazhdueshëm të proceseve klinike, sigurisë së pacientëve dhe cilësisë së shërbimeve shëndetësore. Njëkohësisht, ai përfaqëson një motivim shtesë për të vazhduar në drejtim të zhvillimit dhe avancimit të mëtejshëm të institucionit. U shprehim mirënjohje të veçantë të gjithë stafit dhe ekipit të përfshirë drejtpërdrejt në procesin e akreditimit të cilët me profesionalizëm dhe përkushtim kontribuuan në këtë sukses të përbashkët”, ka thënë Elezi.
