Kryetari i komunës së Çairit, Izet Mexhiti në një deklaratë për Alsat-M ka thënë se në Masterplanin për Çairin, si një projekt i promovuar gjatë fushatës zgjedhore, po punohet intensivisht.
Ai ka thënë se projekti nuk është i afatizuar, por është një strategji për të cilën punohet me vizion.
Kjo deklaratë e tij, madje rrëzon poshtë pretendimet e BDI-së se kinse ka moratorium të projekteve për Çairin.
“E para Masterplani nuk është i afatizuar me muaj. Masterplani është një vizion për projekte strategjike për Çairin për të cilat po punohet intensivisht, kemi pas disa takime me Qytetin e Shkupit, se kryesisht janë rrugë të Qytetit të Shkupit me kompetenca”, u shpreh Mexhiti.
Si një projekt i prezantuar fuqishëm gjatë fushatës zgjedhore nga ana e Mexhitit bashkë me arkitektin me renome botërore, Bajram Vardar, kujtojmë se ky projekt i siguroi atij fitore të madhe në zgjedhjet lokale kundrejt Bujar Osmanit nga BDI.
Masterplani është një dokument strategjik i cili synon transformimin e komunës së Çairit në model të zhvillimit të qëndrueshëm, me infrastrukturë moderne, gjelbërim urban, hapësira kulturore dhe qendra të reja arsimore e rinore.
Mexhiti: Në Masterplanin për Çairin punohet intensivisht
