Humbja 4-3 ndaj Spartës së Roterdamit ka thelluar krizën te Feyenoordi dhe ka sjellë në sipërfaqe tensione serioze brenda klubit. Trajneri Robin van Persie, i kritikuar gjithnjë e më shumë nga mediat, vendosi ta linte në stol ish-kapitenin Quinten Timber, duke përmendur mungesën e angazhimit në stërvitje si arsye kryesore.
Timber reagoi hapur pas ndeshjes, duke shprehur pakënaqësi për mënyrën se si trajneri e ka ekspozuar publikisht, duke theksuar se kjo situatë nuk po ndodh për herë të parë dhe se ekziston një kufi i durimit. Ai foli për mungesë mbrojtjeje nga stafi teknik dhe për krijimin e një perceptimi të gabuar rreth profesionalizmit të tij.
Sipas raportimeve nga Holanda, tensioni kulmoi në dhomën e zhveshjes, ku Van Persie dhe Timber u përplasën kokë më kokë në një sherr të ashpër, incident që u pa edhe nga drejtori i klubit, Dennis te Kloese. Ngjarja shton edhe më shumë presion mbi Van Persie, në një moment delikat për Feyenoordin, teksa e ardhmja e Timberit lidhet gjithnjë e më shumë me një largim të mundshëm drejt Olympique Marseille.
