Zëvendëskryeministri i parë dhe ministër për Çështje Evropiane, Bekim Sali ka bërë të ditur se sot Qeveria ka miratuar dy programe për ndërtimin dhe rikonstruimin e shkollave fillore dhe të mesme.
Sipas tij, Qeveria investon në dije dhe barazi: shkolla të reja dhe të rikonstruktuara dhe se arsimi mbetet prioritet i yni dhe themel i së ardhmes së vendit.
“Sot Qeveria mori vendime konkrete për të ardhmen e vendit. U miratuan dy programe për ndërtimin dhe rikonstruktimin e shkollave fillore dhe të mesme. Janë ndarë 75 milionë denarë për shkollat fillore dhe 80 milionë denarë për shkollat e mesme. Këto janë investime reale në dije, barazi dhe perspektivë për fëmijët tanë. Në Kumanovë po bëhet realitet gjimnazi ‘Sami Frashëri’, ndërsa në Sellcë të Tetovës po ndërtohet objekt i ri shkollor për nxënësit e arsimit fillor. Po ashtu, janë siguruar mjete për rikonstruktimin e shkollave ekzistuese, në mënyrë që nxënësit dhe mësimdhënësit të kenë kushte dinjitoze. Kjo është politikë me vepra, jo me fjalë. Arsimi mbetet prioritet i yni dhe themel i së ardhmes së vendit”, ka shkruar në rrjetet sociale, zëvendëskryeministri Sali.
