Ministri i Politikës Sociale, Demografisë dhe të Rinjve, Fatmir Limani, po merr pjesë në konferencën rajonale triditore në Bukuresht të Rumanisë. Konferenca, e titulluar – Nga korniza në veprim: Ndërtimi i shërbimeve sociale më të forta, më gjithëpërfshirëse dhe të integruara, i unifikoi politikëbërësit qeveritarë në nivel evropian,përfaqësuesit e Bankës Botërore për Evropën dhe Azinë, akademikët dhe ekspertët e politikave sociale, me qëllim shkëmbimin e përvojave dhe përparimin e shërbimeve sociale.
Ministri Limani, i cili mbajti fjalim në sesionin ministror, iu referua reformës së sistemit të mbrojtjes sociale në Maqedoninë e Veriut, e filluar në vitin 2019, e cila përfaqëson pasqyrim të drejtpërdrejtë të prioriteteve strategjike të Qeverisë – drejtësi sociale, përfshirje ekonomike, kujdes për të rinjtë dhe familjet, dhe ndërtim të një shteti funksional, modern dhe digjital.
“Në kushte krizash të shumëfishta – ekonomike, shëndetësore dhe energjetike, ne vendosëm të investojmë te njerëzit. Andaj, kjo reformë e vlefshme. Ajo e ndryshoi logjikën e sistemit: nga ndihma e fragmentuar në të integruar, nga administratimi në përkujdesje, nga institucionet e centralizuara drejt shërbimeve pranë qytetarëve. Kjo reformë është rezultat i bashkëpunimit afatgjatë dhe të vazhdueshëm me Bankën Botërore, mbështetja profesionale dhe financiare e së cilës ishte thelbësore për përgatitjen dhe zbatimin e suksesshëm të saj. Pa këtë mbështetje, procesi reformues vështirë se do të ishte realizuar ose do të kishte arritur rezultatet e planifikuara” – theksoi Limani.
Ai theksoi disa ndryshime kyçe që kanë kontribuar në përparimin e mbrojtjes sociale në vend, siç është krijimi i kornizës së fortë ligjore dhe institucionale, në përputhje me standardet evropiane. Krahas kësaj, vuri në dukje Ligjin e ri të Mbrojtjes Sociale, Ligjin e Sigurimit Social për të Moshuarit, si dhe ndryshimet e Ligjit të Mbrojtjes së Fëmijëve, të cilët janë themeli i ndërtimit të sistemit të drejtë, transparent dhe të qëndrueshëm.
“Luftën kundër varfërisë dhe të përjashtimit social e adresuam përmes reformës themelore të kompensimeve monetare. E thjeshtësuam sistemin, vendosëm targetim real sipas nevojave të amvisërive, si dhe i rritëm shumat për kategoritë më të cenueshme me mbi 300%” – shtoi mes tjerash, Limani.
Limani foli edhe për reformën themelore të qendrave për punë sociale, me të cilën do të transformohet mbrojtja sociale nga një sistem pasiv në një sistem aktiv. Foli edhe për investimet në infrastrukturë, për burimet njerëzore dhe për profesionalizimin e shërbimeve.
Ai theksoi decentralizimin dhe zhvillimin e shërbimeve sociale si pasqyrim të qartë dhe të drejtpërdrejtë të politikës qeveritare për zhvillim të balancuar rajonal.
“Sot, funksionon rrjet prej mbi 150 ofruesish të licencuar të shërbimeve sociale, ndërkaq, shërbimet për ndihmë dhe kujdes në shtëpi dhe asistenca personale tashmë janë realitet në dhjetëra komuna të vendit, duke ofruar mbështetje, dinjitet dhe përfshirje më të madhe të kategorive më të cenueshme të qytetarëve. Si rezultat, përveç përmirësimit të kujdesit, u krijuan mbi 1,500 vende të reja pune për personat, të cilët më parë ishin përfitues të ndihmës sociale ose të papunë afatgjatë” – tha Limani.
Ai iu referua edhe krijimit të sistemit digjital të integruar, i cili i ndërlidh institucionet dhe lejon që 90% e të dhënave të shkëmbehen sipas detyrës zyrtare, në kohë reale. Ai potencoi se kjo nënkupton më pak administrim, më pak rrezik korrupsioni dhe më shumë besim në institucione.
“Kjo reformë është dëshmi se politika sociale mund të jetë shtyllë e zhvillimit ekonomik, e stabilitetit demografik, si dhe e integrimit evropian” – u shpreh Limani.
Në kuadër të vizitës nè Rumani, ministri Limani realizoi takim bilateral me ministrin e Punës, Familjes, Rinisë dhe Solidaritetit Social të Rumanisë, Petre-Florin Manole. Në takim u diskutua për bashkëpunimin e deritanishëm ndërmjet dy vendeve dhe thellimin e tij, si dhe për shkëmbimin e përvojave në fushat që janë në kompetencë të ministrive, nga të cilat përfitime do të kishin qytetarët e të dy shteteve.
