Kryetari i Qeverisë së Republikës së Maqedonisë së Veriut, Hristijan Mickoski, i shoqëruar nga delegacion i lartë qeveritar, duke filluar nga nesër do të marrë pjesë në takimin vjetor të 56-të me rradhë të Forumit Ekonomik Botëror (WEF) në Davos, Zvicër.
Forumi i këtij viti, i cili mbahet nën moton “Në frymën e dialogut”, bashkon mbi 65 krerë shtetesh dhe qeverish, me qëllim gjetjen e zgjidhjeve për sfidat më të rëndësishme globale.
Kryeministri Mickoski do të realizojë një sërë takimesh bilaterale me përfaqësues të korporatave kryesore botërore dhe institucioneve financiare, duke prezantuar përparësitë për investim në ekonominë maqedonase, me fokus të veçantë në energjetikë dhe teknologji.
Në panel-diskutimet të lidhura me zhvillimin e qëndrueshëm, në të cilat do të marrë pjesë delegacioni maqedonas, do të prezantohen planet strategjike për transformimin energjetik dhe lidhjen infrastrukturore të rajonit.
Gjatë samitit, është paraparë që kryeministri Mickoski të marrë pjesë në sesione të mbyllura për liderët, si dhe në debate publike të fokusuara në inteligjencën artificiale, energjetikën dhe rrugët e reja për rritje ekonomike në Evropë.
Delegacioni qeveritar në Davos do të zhvillojë gjithashtu takime me përfaqësues të lartë shtetërorë dhe përfaqësues të organizatave ndërkombëtare, me qëllim përshpejtimin e proceseve reformuese dhe sigurimin e mbështetjes për projektet kyçe nacionale.
