20 të arrestuar, kontrolle në 16 lokacione dhe dëmi prej 4,8 milionë euro është epilogu i aksionit të mbrëmshëm të policisë i cili u realizua pas njoftimit të marrë nga Agjencia për Siguri Kombëtare. I dyshuari kryesor është shtetas serb, pronar dhe drejtues i dy kompanive, të cilit të punësuar në DAP përmes të dhënave të rreme në deklaratat tatimore i kanë ndihmuar të shmangë pagesën e tatimit. Të dyshuarit e tjerë, mes tyre pronarë kompanish nga Shkupi dhe Gjevgjelia, gjithashtu me ndihmën e të punësuarve në DAP, në disa raste kanë marrë kthim tatimi të paarsyeshëm për persona juridikë jorezidentë.
“Me paraqitjen e të dhënave të pasakta në deklaratat tatimore dhe me ndihmën e nëpunësve tatimorë nga DAP, gjatë periudhës 2023–2024 i dyshuari kryesor ka shmangur pagesën e tatimit në vlerë prej 11.593.403 denarë. Të tjerët, pronarë dhe drejtues të personave juridikë, me deklarata të rreme kanë kërkuar, ndërsa të punësuarit e dyshuar u kanë miratuar kthim tatimi të paarsyeshëm për persona juridikë jorezidentë, duke shkaktuar dëm në buxhet në vlerë prej 31.175.168 denarë”, thonë nga PTHP NKOK.
Përmes aktiviteteve ilegale për fshehjen e origjinës së parave, të dyshuarit kanë shkaktuar dëm mbi 90 milionë denarë, ndërsa sipas Prokurorisë, të punësuarit në DAP përmes abuzimeve kanë dëmtuar buxhetin për shumë mbi 162 milionë denarë.
“Deri tani, provat e mbledhura tregojnë se të punësuarit e dyshuar në DAP– Drejtoria rajonale Shkup, disa prej tyre në pozita të larta drejtuese, me abuzime të shumta të pozitës zyrtare, kanë shkaktuar dëm total në buxhetin e RMV-së prej të paktën 162.980.076 denarë”, njoftojnë nga PTHP NKOK.
Përveç evazionit fiskal, të ndaluarit akuzohen edhe për veprat penale mashtrim tatimor, pastrim parash dhe abuzim të pozitës zyrtare. Gjatë kontrolleve të mbrëmshme, policia ka konfiskuar dokumentacion fiktiv, para, armë dhe vula të rreme të personave juridikë. Nga gjithsej 20 të dyshuar, Prokuroria për Ndjekjen e Krimit të Organizuar ka kërkuar nga Gjykata Penale paraburgim efektiv për 8 persona, ndërsa për dy persona paraburgimi tashmë është caktuar në rast tjetër të lidhur me Agjencinë për Mbështetje Financiare në Bujqësi. Për dhjetë të tjerët janë kërkuar masa kujdesi, ndërsa për 9 prej tyre gjykata tashmë e ka pranuar kërkesën, pra u është marrë pasaporta dhe u është ndaluar e drejta për të punuar. /Alsat.mk
