Zulhajrat Demiri pas mbylljes së zgjedhjeve: Falënderoj qytetarët dhe përkrahësit, angazhimi im për të mirën e komunitetit nuk do të ndalet
Kandidati për Komunën e Vrapçishtit i përkrahur nga VLEN, Zulhajrad Demiri, është deklaruar në Facebook pas përfundimit të procesit zgjedhor. Ai falënderon të gjithë qytetarët për mbështetjen që ia kanë dhënë, duke i siguruar se do të jetë pranë tyre për të mirën e përbashkët.
Demiri thotë se e ka humbur garën zgjedhore, por nuk do ta ndal angazhimin e tij për të mirën e komunës.
Më poshtë e keni njoftimin e plotë të Zulhajrat Demiri:
Të nderuar qytetarë, mbështetës dhe bashkëpunëtorë,
Ju falënderoj nga zemra për mbështetjen, besimin dhe energjinë që më dhatë gjatë kësaj gare zgjedhore, por veçanërisht ju falënderoj nga zemra për çdo mesazh, telefonatë dhe fjalë mbështetjeje që kam marrë këto ditë pas zgjedhjeve. Tani, çdo fjalë përkrahjeje ka shumë vlerë për mua. Mbështetja juaj është forca ime më e madhe. Jam thellësisht mirënjohës për secilin prej jush.
Falënderoj veçanërisht ekipin tim, vullnetarët, miqtë që qëndruan pranë me zemër e shpirt. Dhe të gjithë ata që punuan pa u lodhur, me ndershmëri dhe përkushtim, për një vizion më të mirë për komunën tonë. Ju jeni fitorja ime më e madhe. Ne humbëm një garë, por jo besimin tek njëri-tjetri dhe as dashurinë për komunën tonë.
Angazhimi im për komunitetin nuk ndalet këtu. Do të vazhdoj të jem pranë jush dhe të kontribuoj për të mirën e përbashkët, sepse angazhimi për këtë vend nuk përfundon me zgjedhje.
Faleminderit nga zemra dhe respekt për të gjithë!
PS:
Ndjesë nga zemra për të gjitha mesazhet dhe telefonatat që nuk kam mundur t’ua kthej. Kanë qenë të panumërta, por secila më ka prekur thellë dhe secila prej tyre ka pasur vlerë të veçantë për mua.
Ju falënderoj sinqerisht për mirëkuptimin!
