Kryetari i Kuvendit, Afrim Gashi në intervistën e sontme për Alsat-M e ka vlerësuar si konstruktiv takimin e sotëm të liderëve të thirrur nga kryeministri Hristijan Mickoski.
Ai thekson se si demokraci po piqemi, dialogu është i hapur dhe këtë e nënkupton demokracia parlamentare, “të ulemi në tryezë edhe me ata që nuk mendojnë si ne dhe se kjo përbën një vlerë të shtuar”.
“Më gëzon fakti që Kuvendi po kthehet në një qendër ku do të duhet të zgjidhen çështjet. Gjatë kohë Kuvendi ka qenë vetëm çështje kolaterale, anësore ku gjitha marrëveshjet janë bërë diku tjetër dhe janë implementuar në Kuvend. Më gëzoi fakti që liderët janë marrë vesh që bisedimet konkrete për zgjidhjen e problemeve do të vazhdojnë nesër në Kuvend në nivel të koordinatorëve për ligjet konkrete dhe i inkurajoj koordinatorët me atë energji konstruktive si liderët në tryezën e diskutimeve të vijnë nesër në Kuvend, të vazhdojmë bisedimet dhe të sjellim ligje në interes të gjithë qytetarëve”, tha Gashi.
Ai thotë se janë kryetarët e partive ata që e kanë pushtetin kryesor brenda subjekteve të tyre dhe kur bëhet fjalë për dakordim, “ata duhet të merreni vesh se si do rrjedhë procesi”.
”Mendoj se ky kombinim që është bërë sot ku liderët takohen, bisedojnë dhe flasin dhe ua lënë pastaj koordinatorëve në Kuvend për të gjetur zgjidhje konkrete për ligjet përkatëse, mendoj se është mënyra më e mirë e funksionimit të demokracisë”, tha kryeparlamentari Gashi.
