Në kuadër të Samitit Botëror të Sigurisë – World Safety Summit 2026, i cili u mbajt në Dubai, drejtori i Qendrës për Menaxhimin e Krizave, Muamet Ali, zhvilloi një sërë takimesh bilaterale dhe multilaterale me përfaqësues të shteteve të ndryshme, me fokus në forcimin e bashkëpunimit ndërkombëtar në fushën e menaxhimit të krizave dhe sigurisë.
Gjatë samitit, një rëndësi e veçantë iu kushtua takimit me drejtorin e përgjithshëm të Mbrojtjes Civile të Dubait, Lt. Gen. Rashid Thani Al Matrooshi, ku u diskutua mbi bashkëpunimin institucional dhe shkëmbimin e përvojave lidhur me përgjigjet efektive ndaj situatave emergjente.
“Bashkëpunimi institucional dhe ndarja e praktikave më të mira janë thelbësore për ndërtimin e sistemeve të qëndrueshme të reagimit ndaj krizave, veçanërisht në një botë që përballet me sfida gjithnjë e më komplekse”, u shpreh drejtori Ali pas takimit.
Në kuadër të sesionit plenar, drejtori i Qendrës për Menaxhimin e Krizave mori pjesë edhe në një tryezë të rrumbullakët, ku theksoi rëndësinë e koordinimit ndërkombëtar, shkëmbimit të informacioneve dhe përgatitjes së përbashkët për përballimin e krizave globale.
“Vetëm përmes koordinimit të ngushtë, komunikimit të hapur dhe trajnimeve të përbashkëta mund të rrisim kapacitetet tona për të reaguar në mënyrë efikase ndaj emergjencave”, theksoi Ali.
Sipas tij, angazhimi në kuadër të këtij samiti dhe takimet e zhvilluara kontribuojnë drejtpërdrejt në forcimin e partneriteteve ndërkombëtare dhe në rritjen e kapaciteteve kombëtare për mbrojtjen e qytetarëve dhe garantimin e sigurisë së vendit.
