Ish-Presidenti amerikan, Bill Clinton dhe ish-Sekretarja e Shtetit, Hillary Clinton, kanë refuzuar të dëshmojnë në Kongres përpara Komitetit të Mbikëqyrjes të Dhomës së Përfaqësuesve, në kuadër të hetimit për Jeffrey Epstein, shkruan CNN, përcjell Reporteri.net.
Në një letër drejtuar kryetarit republikan të komitetit, James Comer, i cili kishte vendosur një afat përfundimtar për paraqitjen e tyre këtë javë, ata shkruan “Ju do të thoni se nuk është vendimi ynë për ta marrë. Por ne e kemi marrë atë. Tani ju duhet të merrni tuajin”.
Comer u tha gazetarëve të mërkurën se komiteti do të mblidhet javën e ardhshme për të ecur përpara me procedurat ndaj Bill Clintonit — duke lënë të hapur mundësinë që ish-sekretarja e Shtetit ende mund të ndryshojë mendje.
Çifti pohuan në letra se po veçoheshin padrejtësisht.
“Çdo person duhet të vendosë momentin kur ka parë ose ka duruar mjaftueshëm dhe është gati të luftojë për këtë vend, për parimet e tij dhe për njerëzit e tij, pavarësisht pasojave. Për ne, ky është tani ai moment,” shkruan ata.
Ndryshe, Departamenti i Drejtësisë në Shtetet e Bashkuara të Amerikës javë më parë ka nisur publikimin e mijëra dokumenteve të Jeffrey Epsteinit, abuzuesit seksual të vajzave të mitura, që kishte lidhje të fuqishme me politikanë, akademikë e biznesmenë të rangut të lartë.
Publikimi vjen pas miratimit nga Kongresi të Ligjit për Transparencën e Dosjeve Epstein, i cili detyron Departamentin e Drejtësisë të bëjë publike të gjitha materialet e paklasifikuara që lidhen me hetimin dhe ndjekjen penale të Epstein, i cili vdiq në burg në vitin 2019, ndërsa priste gjyqin për akuza federale për trafikim seksual të të miturve.
Ndër fotografitë e sapolansuara përfshihen ato të ish-presidentit Bill Clinton duke notuar në një pishinë. Fotografitë s’mbajnë datë dhe detaje se ku janë shkrepur.
