Kryetari i komunës së Tetovës dhe njëri nga liderët e VLEN, Bilall Kasami në intervistën në Alsat-M, ka konfirmuar se do të jetë pjesë e takimit të liderëve të thirrur nesër nga kryeministri Hristijan Mickoski, ku do të marrë pjesë edhe koordinatori i grupit parlamentar të VLEN, Bekim Qoku.
Sipas Kasamit, ajo që është përparësi e VLEN është se për shumë çështje, siç thekson “shumë lehtë merren vesh dhe as që ka pretendime të problematizohet kjo si çështje”.
“Për pjesëmarrjen jemi konsultuar, propozimi ka qenë i koordinatorit të grupit parlamentar, ai e ka dhënë propozimin dhe është pranuar nga të gjithë liderët e VLEN”, tha Kasami.
Prandaj VLEN, shton ai me gjitha sfidat me të cilat është ballafaquar, ka ardhur deri këtu dhe do të vazhdojë shumë gjatë më tutje, sepse vetë formati i VLEN tregon se ne kemi arritur të bëjmë të pamundurën, ajo që nuk është bërë në 30 vitet në të kaluarën që të jemi bashkë dhe të dakordohemi.
Drejt integrimit në një subjekt
Se kur do të formohet VLEN në një parti të vetme, Kasami thekson është një proces kompleks edhe pse e kuptojnë opinionin, aktivistët se duhet të ndodhë kjo sa më shpejt.
“Është një proces si që ishte procesi i formimit të VLEN, e dinë opinioni se si nisi dhe si erdhi ky format, sfidat që patëm me largimin e Arben Taravarit dhe vazhdimin e Arben Fetait në emër të Aleancës, sot jemi në një proces për të shkuar një hap më tutje drejt integrimit në një subjekt politik”, tha ai.
Limani është pjesë e VLEN-it
Në pyetjen se pse mungoi Fatmir Limani në takimin e sotëm koordinues të zv/kryeministrit Bekim Sali me ministrat, Kasami me qëndrim se Fatmir Limani është pjesë e VLEN-it.
“Ai është pjesë e VLEN, është në detyrë në vendin e punës. Në moment të caktuar që kanë qenë obligime dhe përgjegjësi të tij, duhet ta pyesni atë, ashtuqë derisa nuk kemi një vendim për një emër të përveçëm, ai është përfaqësues edhe i Besës në VLEN edhe i VLEN në qeveri”, ka thënë Kasami.
