Мinistrija e Energjisë, Minierave dhe Burimeve Minerale, Sanja Bozhinovska, sot realizoi një takim pune me ambasadoren e Japonisë në Maqedoninë e Veriut, Setusko Kavahara.
Në takim morën pjesë edhe përfaqësues të korporatës japoneze ITOCHU, një nga kompanitë udhëheqëse dhe më prestigjioze në Japoni, e njohur për aktivitetet e saj investuese dhe ekspertizën në projekte energjetike dhe industrial. ITOCHU është një kompani serioze me prani globale, e cila shpreh interes edhe për tregun maqedonas dhe potencialet për transformim të gjelbër energjetik në vend.
Gjatë takimit u diskutua për thellimin e bashkëpunimit bilateral, në sektorin e energjetikës, si dhe për projekte të përbashkëta që lidhen me tranzicionin e gjelbër.
Ministrja Bozhinovska theksoi se vendi ynë është i përkushtuar në ndërmarrjen e hapave konkretë drejt një të ardhmeje energjetike të qëndrueshme, të sigurt dhe gjithëpërfshirëse. Ajo e vlerësoi mbështetjen nga pala japoneze si të rëndësishme për sigurimin e pavarësisë dhe qëndrueshmërisë energjetike.
Të dyja palët konfirmuan nevojën për forcimin e pozitës së Maqedonisë së Veriut në hartën globale energjetike si një partner i besueshëm dhe kredibil në tranzicionin botëror drejt energjisë së gjelbër. Në fund, u konkludua se bashkëpunimi në fushën e reformave energjetike dhe projekteve infrastrukturore do të vazhdojë edhe në të ardhmen.
