Ali Ahmeti apo Arben Taravari. Ende nuk është e qartë kush do të jetë përfaqësues i opozitës shqiptare në takimin që është thirrur nga kryeministri Hristijan Mickoski, në të cilin mes tjerash pritet të diskutohet edhe për heqjen e Qeverisë teknike.
Pas fitoreve në Gostivar dhe Vrapçisht, Arben Taravari mendon se ai është lider i opozitës, gjë që e ka thënë edhe pas përfundimit të zgjedhjeve lokale të tetorit 2025, kur në një postim në Facebook shkroi se Gostivari do te jetë qendra e opozitës shqiptare.
Sipas informacioneve që kemi, Taravari insiston që në takim duhet të marrin pjesë edhe ai edhe Ali Ahmeti, ose asnjëri. Këto pretendime nga Taravari po interpretohen si sfidë e drejtpërdrejtë ndaj Ali Ahmetit dhe rolit të tij tradicional në përfaqësimin politik të shqiptarëve.
Kjo situatë shihet si një tjetër dëshmi e mungesës së unitetit në opozitën shqiptare, e cila edhe në momente të rëndësishme nuk arrin të dalë me një qëndrim të përbashkët. Përplasjet për protagonizëm dhe lidership, rrezikojnë ta zbehin peshën politike të opozitës shqiptare në proceset vendimmarrëse në periudhën në vijim.
Ndryshe nga kjo paqartësi në AKI, në koalicionin VLEN gjërat janë të qarta. Është konfirmuar se Bilall Kasami do ta përfaqësojë këtë koalicion në takimin me kryeministrin Mickoski, duke dhënë sinjal për një qëndrim të unifikuar dhe të koordinuar.
