Kandidati për kryetar të Komunës së Vrapçishtit, Zulhajrat Demiri, në emisionin ON TIME në TV KOHA, ka dhënë garanci se administrata komunale nuk do të përballet me presione apo largime të padrejta nga puna, duke theksuar se vetëm abuzimet eventuale do të sanksionohen.
“Dua t’i apeloj të gjithë administratorët dhe punonjësit e Komunës që të rrinë rehat. Ne duhet t’i lëmë rehat dhe t’ua japim dekretet dhe detyrat, sepse dekretet dhe detyrat i marrin nga kryetari dhe nga punëdhënësi”, deklaroi Demiri.
Ai theksoi se filozofia e tij e menaxhimit bazohet në profesionalizëm dhe respekt ndaj administratës.
“Në këtë drejtim ne duhet t’i lëmë të punojnë punën e tyre ashtu siç duhet dhe siç e meritojnë qytetarët”, u shpreh kandidati.
Duke folur për çështjen e abuzimeve eventuale në institucionet komunale, Demiri ishte i prerë se do të ketë tolerancë zero ndaj rrogave fiktive.
“Ne do të largojmë vetëm ata njerëz që figurojnë në institucionet komunale me rroga fiktive, nëse ka”, tha ai, duke sqaruar se nuk bëhet fjalë për largime nga puna, por për ndërprerje kontratash të padrejta.
“Ata nuk do të largohen nga puna, por vetëm nga kontrata, sepse nuk e meritojnë qytetarët dhe taksapaguesit të paguajnë rroga për njerëz që, eventualisht, marrin paga dhe nuk janë pjesë aktive e institucioneve komunale”, theksoi Demiri.
Sipas tij, kjo qasje synon të mbrojë interesin publik, të forcojë besimin e qytetarëve dhe të garantojë një administratë funksionale, profesionale dhe në shërbim të qytetarëve të Komunës së Vrapçishtit.
Demiri: Administrata komunale do të punojë e lirë, pa presione politike
