Kryetari i Kuvendit, Afrim Gashi dhe zëvendëskryeministri i parë, Bekim Sali sot në Prishtinë kanë realizuar takim me nënkryetarin e Lëvizjes Vetëvendosje, Glauk Konjufca.
Gashi dhe Sali e kanë uruar Konjufcën dhe VV-në për rezultatin e arritur në zgjedhjet parlamentare, duke theksuar me këtë rast rëndësinë e konstituimit të shpejtë të institucioneve të atjeshme.
“Në Prishtinë, bashkë me zv/kryeministrin e parë Bekim Sali, patëm një takim miqësor me nënkryetarin e Lëvizjes Vetëvendosje, Glauk Konjufca.
I uruam për rezultatin e arritur në zgjedhjet parlamentare, duke theksuar rëndësinë e konstituimit të shpejtë të institucioneve për të siguruar stabilitet dhe avancim”, thekson Gashi.
Ai shton se është biseduar njëherësh edhe për vazhdimin e bashkëpunimit ndërinstitucional, si dhe për sfidat dhe mundësitë që paraqesin rrethanat gjeopolitike.
“U pajtuam të vazhdojmë të punojmë fuqishëm në forcimin e marrëdhënieve, duke kontribuar në zhvillimin dhe integrimin evropian të vendeve tona”, shkruan kryeparlamentari Gashi.
