Kryetari i Qeverisë së Republikës së Maqedonisë së Veriut, Hristijan Mickoski, duke iu përgjigjur pyetjes gazetareske për planet e Qeverisë në fushën e arsimit për vitin e ri, informoi se janë rritur mjetet që shërbejnë për mbështetjen e projekteve shkencore-kërkimore.
“Po, faleminderit për pyetjen. Unë vij nga arsimi, jam profesor universiteti dhe është logjike që arsimi të jetë një nga prioritetet më të larta. Vlerësoj se pa arsim cilësor dhe pa shkencë cilësore nuk mund të forcohemi as si komb, as si shtet. Dhe në emër të kësaj, po rrisim fondet që janë për mbështetjen e projekteve shkencore dhe kërkimore. Nëse filluam me një buxhet prej 340 milionë denarësh në vitin 2023, në vitin 2024 dhe 2025 i jemi afruar shifrës prej 680 milionë denarësh, kështu që tani për vitin e ardhshëm kemi mbi 770 milionë denarë për këtë qëllim.
A është mjaftueshëm? Jo. A duhet më shumë? Duhet. Por është shumë më tepër, do të thosha, nga ajo gjendje në të cilën e gjetëm. Kështu që pres që në vitet në vijim, edhe me ndryshimet në Ligjin për Arsimin e Lartë, kolegët e mi që do të duan të ndërtojnë karrierë akademike do të duhet të shkruajnë pak më shumë punime, punime shkencore-kërkimore që do të botohen në revista me faktor ndikimi dhe që do të jenë pjesë e bazës ‘Thomson Reuters'”, deklaroi kryeministri.
Kryeministri theksoi se nëse si shtet duam të kemi një universitet që do të jetë në një mijë të parët sipas Listës së Shangait, duhet të rritet numri i punimeve shkencore në revista me faktor ndikimi.
“Sepse bëmë një analizë e cila na çon drejt asaj se, nëse duam të kemi një universitet që do të jetë në një mijë të parët sipas Listës së Shangait, duhet ta rrisim tetë deri në dhjetë herë numrin e punimeve shkencore të cilat, si shtet dhe si universitete, duhet t’i botojmë në revista shkencore me faktor ndikimi, e që janë pjesë e bazës ‘Thomson Reuters’ apo e njohur si Web of Science’.
Mendoj se me rritjet e fundit, do të thosha, të ardhurat e profesorëve të rregullt, Profesorëve të asociuar, docentëve dhe asistentëve janë mjaft dinjitoze. Dhe mendoj se tani duhet të kthehemi kah shkenca dhe drejt asaj që është veprimtaria bazë e një profesori – përveç veprimtarisë arsimore, ai ka edhe veprimtari shkencore, përkatësisht obligimin për të krijuar në shkencë. Pres që në vitet që vijojnë, pas miratimit të Ligjit të ri për Arsimin e Lartë, të kemi aktivitet frytdhënës nga kolegët e mi dhe, në fund të mandatit të kësaj qeverie, të gëzohemi për parametrin ku do të kemi të paktën një universitet në 1.000 të parët sipas Listës së Shangait”, shpjegoi kryeministri.
