Përfaqësuesja e Maqedonisë së Veriut po hyn në një fazë të re organizimi, teksa shtabi profesional i ekipit kombëtar po kompletohet gradualisht nën drejtimin e përzgjedhësit Goce Sedlloski. Strategu vendas ka zgjedhur të bashkëpunojë me figura të njohura të futbollit vendor, duke vënë theksin te përvoja dhe vazhdimësia.
Sedlloski do të ketë në dispozicion tre asistentë: Borçe Hristov, aktualisht shef i shtabit profesional të KF Tikvesh dhe drejtor i Qendrës për Edukim, Erhan Selimi, ish-përzgjedhës i kombëtares U19, si dhe Zoran Boshkovski – Çoko.
Stafi profesional do të përforcohet edhe me Vançe Shikov, ish-mbrojtës i përfaqësueses, i cili ka zhvilluar 58 ndeshje ndërkombëtare, ndërsa Gogo Jovçev është emëruar trajner i portierëve.
Analiza e ndeshjeve dhe përgatitja taktike do të mbulohet nga Martin Hristov, i cili do të jetë video-analist i ekipit A. Ndërkohë, trajneri për përgatitje fizike ende nuk është zyrtarizuar dhe pritet të prezantohet në vazhdim.
Me këto emërime, përzgjedhësi Sedlloski synon të krijojë një bazë të qëndrueshme profesionale, duke orientuar përfaqësuesen drejt progresit dhe rezultateve pozitive në periudhën që vjen.
