Policia e Kosovës ka njoftuar se, sipas planifikimeve të parapara, ka aktivizuar planin operativ policor për mbarëvajtjen dhe sigurinë e zgjedhjeve të parakohshme për Kuvendin e Republikës së Kosovës, që po mbahen sot, më 28 dhjetor 2025.
Sipas njoftimit, zyrtarët policorë kanë nisur angazhimin që nga ora 03:00, me hapjen e dhomave komanduese, përcjelljen e materialit zgjedhor dhe sigurimin e qendrave të votimit.
Policia thekson se aktualisht është në zbatim faza kyçe e ditës së zgjedhjeve, ndërsa do të vijojë edhe faza paszgjedhore, përfshirë transportin e materialit sensitiv nën masa të shtuara sigurie.
“Plani operativ përfshin katër faza:
1) Periudha parazgjedhore apo përgatitore vlerësuese,
2) Angazhimi në ofrimin e sigurisë gjatë fushatës zgjedhore,
3) Garantimi i sigurisë në fazën kyçe të ditës së ZGJEDHJEVE dita (Z),
4) Periudha pas zgjedhjeve që parasheh transportin nën përcjellje dhe siguri të PK-së, të materialit sensitiv e deri në përfundim të procesit.
Faza e parë dhe faza e dytë tani veçse janë realizuar dhe jemi në zbatim të fazës së tretë si faza kyçe (dita Z), për të vazhduar sipas planit me fazën e katërt, deri në përfundim të procesit zgjedhor.
Sipas planifikimeve policore qëllimi i këtij urdhri operativ edhe në këtë proces zgjedhor është: Krijimi i një klime të qetë dhe të sigurt për të gjithë qytetarët e Republikës së Kosovës si dhe mbajtja e rendit, qetësisë dhe sigurisë publike në vend para-gjatë dhe pas procesit të zgjedhjeve. Ngritja e vigjilencës, sigurimi i qendrave të votimit, depove komunale dhe qendrës së numërimit të rezultateve. Përcjellja e sigurt dhe sigurimi i gjithë materialit sensitiv zgjedhor nga të gjitha destinacionet e parapara sipas planit të sigurisë deri në përfundimin e operacionit policor, që ndërlidhet me procesin zgjedhor. Profesionalizëm / Integritet / Llogaridhënie
Inicimi dhe procedimi i çdo vepre penale kundër të drejtës së votimit dhe ndërmarrja e të gjitha masave procedurale/penale ndaj çdokujt që bie ndesh me ligjet pozitive të vendit qërregullojnë/sanksionojnë veprimet e kundërligjshme ndaj zgjedhjeve të lira dhe demokratike, në koordinim dhe në bashkëpunim të ngushtë me Prokurorinë e Shtetit sipas planeve të veprimit dhe marrëveshjeve paraprake të bazuara në ligj.
Sipas memorandumit të bashkëpunimit në mes të Policisë, Prokurorisë dhe KQZ-së, Policia e Kosovës ka caktuar zyrtarë/hetues në drejtoritë rajonale për trajtimin e çdo rasti të mundshëm që ndërlidhet me procesin zgjedhor, nën autorizimet e prokurorëve të caktuar për këtë çështje nga Prokuroria e Shtetit. Po ashtu janë caktuar edhe koordinatorë të Policisë me KQZ-në si dhe janë dhënë udhëzime për zyrtarët policorë lidhur me detyrat dhe përgjegjësitë e tyre ligjore gjatë procesit zgjedhor.
Policia e Kosovës mbetet e përkushtuar në realizimin e detyrave dhe përgjegjësive të saja ligjore në mënyrë profesionale karshi qytetarëve dhe vendit si dhe të jetë transparente mbi punën dhe angazhimet e saja policore.
Inkurajojmë të gjithë qytetarët që të bashkëpunojnë me Policinë e Kosovës dhe institucionet kompetente, njëherit të raportojnë për çdo rast të kundërligjshëm që ndërlidhet me sigurinë dhe procesin zgjedhor, apo edhe jashtë tyre”, thuhet në njoftimin e Policisë.
