Rritja reale e parashikuar prej 3.8% për vitin 2026 është realisht e arritshme. Të ardhurat tatimore do të realizohen sipas planit, ndërsa dixhitalizimi është faktori kyç në rritjen serioze të shpenzimeve efikase të parave buxhetore. Këtë e theksoi ministrja e Financave, Gordana Dimitrieska-Koçoska në intervistën për revistën mujore “Ekonomia dhe biznesi”.
“Rritja reale e projektuar për vitin 2026 është 3.8% dhe besoj se është realisht e arritshme. Por, sigurisht, ne po monitorojmë situatën në nivel global dhe i marrim parasysh të gjitha rrisqet. Kjo është arsyeja pse buxheti për vitin 2026 nuk është parashikuar me skenar optimist, por do të thoja përkundrazi, me shumë kujdes, madje edhe në mënyrë konservative. Jam e vetëdijshëme se nuk ka më mjete rezervë (bafera) në buxhet që mund të përdoren në kohë krize. Qeveria paraprake përdori gjithçka që kishte mbetur për situata krize dhe nuk arriti të konsolidohej siç bënë vendet fqinje. Kjo është arsyeja pse projeksionet janë shumë të kujdesshme. Ajo që, sigurisht, mbetet është fakti se PBB-ja nominale e parashikuar e këtij viti do të jetë mbi pritjet tona, gjë që lë hapësirë për vitin e ardhshëm në aspektin e paraqitjes së borxhit publik dhe deficitit si përqindje. Sa i përket të ardhurave tatimore, besoj se ato do të arrihen sipas planit dhe nuk ka rrisqe këtu”, tha ministrja në intervistën.
Ajo potencoi se nuk do të ketë ndryshim në tatime dhe se ky është premtim nga programi zgjedhor, por se do të rishikohen të gjitha ligjet në fushën e tatimeve dhe doganave me qëllim të detektohen se ku ka mospërputhje.
“Absolutisht nuk do të ketë ndryshim të tatimeve. Këtë e kemi premtuar edhe në programin parazgjedhor. Gjithmonë kam parashysh rregullin se shtetit duhet t’i paguhet aq sa i takon, as më shumë, por as më pak. Pikërisht për këtë arsye do t’i rishikojmë ligjet, për t’i përcaktuar më qartë çështjet që të mos ketë keqkuptime. Do të jap shembull Ligjin e TVSH-së. Filluan të punojmë më shumë se një muaj më parë. Me këmbënguljen time filluam të lexojmë të gjitha nenet e ligjit dhe konstatuam se çështjet bazë të shkruara që në vitin 2000 nuk janë ndryshuar, por kanë krijuar paqartësi gjatë gjithë këtyre viteve. Për këtë arsye përfshiva edhe ekspertë, kryesisht nga firma konsulente, të cilët çdo ditë përballen me çështje për të cilat nuk mund të japin përgjigje të saktë.
E gjithë kjo po bëhet dhe do të bëhet me qëllim që të kemi ligje sa më të mira dhe më të sakta. Në këtë mënyrë nuk do të mund të anashkalohet sistemi dhe individët të justifikohen me paqartësi në ligje. Për fat të keq, ajo që është shtylla e shtetit, përkatësisht ligjet nga fusha e tatimeve, ndër vite janë ndryshuar vetëm me ndryshime kozmetike. Tani është koha që kjo të ndryshojë. Së pari kemi nevojë të arrijmë që të gjithë të paguajnë tatime, e më pas të mendojmë për ndryshimin e normave tatimore,” theksoi Dimitrieska-Koçoska dhe shtoi se vetëm dixhitalizimi mund ta ulë ndjeshëm shpenzimet joefikase të parave buxhetore.
Gjatë Intervistës ministrja theksoi realizimin e shpenzimeve kapitale, rikthimin e TVSH-së për kompanitë, zbatimin e reformave nga Axhenda reformuese dhe të ngjashme.
