Prej disa ditësh në rrjet po qarkullon lajmi se Nicki Minaj çaktivizoi Instagramin pas reagimeve të forta për daljen e saj në AmericaFest të Turning Point USA, ku u shfaq përkrah Erika Kirk. Megjithatë, faktet tregojnë një histori tjetër.
Edhe pse fansat vunë re se profili @nickiminaj ishte joaktiv në fund të dhjetorit, rezulton se llogaria e saj ishte çaktivizuar shumë më herët, konkretisht më 20 tetor 2025. Kjo do të thotë se mbyllja e Instagramit nuk lidhet me reagimet pas eventit.
Po ashtu, nuk ka asnjë provë të verifikuar se Nicki Minaj humbi 10 milionë ndjekës pas AmericaFest. Para çaktivizimit, ajo kishte rreth 223.8 milionë ndjekës dhe pretendimi për një rënie masive mbetet i pakonfirmuar.
Kritikat ndaj Minaj shpërthyen pasi ajo vlerësoi presidentin Donald Trump dhe zëvendëspresidentin JD Vance gjatë eventit, duke i quajtur “modele për të rinjtë”. Paraqitja e saj u interpretua nga shumë si një afrim me politikën MAGA, gjë që ndezi debat të fortë në rrjete sociale.
