Rektori i Universitetit te Tetovës, Prof. Dr. Jusuf Zejneli i shoqëruar nga Prorektori për Shkencë Prof. Dr. Vullnet Ameti dhe dekania e Fakultetit të Kulturës Fizike, Prof. Dr. Shpresa Memishi i pritën në takim studentët e Universitetit të Tetovës të cilët garuan në volejboll dhe futboll të vogël. Ky takim u organizua me rastin e suksesit të arritur nga studentët tanë në ligën shtetërore universitare të Maqedonisë së Veriut, ku studentët e volejbollit u shpallën kampion duke zënë vendin e parë, ndërsa studentët që garuan në futboll të vogël arritën të sigurojnë vendin e tretë.
Gjatë takimit, drejtuesit e universitetit shprehën mirënjohje për sukseset e arritura, duke theksuar se këto rezultate janë dëshmi e përkushtimit, punës së palodhshme, disiplinës, tolerancës dhe talentit të studentëve tanë. Ata theksuan se Universiteti i Tetovës do të vazhdojë të mbështesë aktivitetet sportive, si pjesë e rëndësishme e zhvillimit akademik dhe personal të studentëve, duke inkurajuar të rinjtë që krahas studimeve të kultivojnë edhe shpirtin sportiv dhe garues.
Ky takim shërbeu si motivim për studentët që të vazhdojnë me përkushtim dhe të synojnë rezultate edhe më të larta në garat e ardhshme, duke e bërë Universitetin e Tetovës një shembull të shkëlqyer të ndërthurjes së suksesit akademik me atë sportiv.
Drejtuesit e Universitetit të Tetovës shprehën mirënjohje për sukseset e studentëve në garat në volejboll dhe futboll të vogël
