Ministri i Politikës Sociale, Demografisë dhe Rinisë, njëherësh anëtar i lartë i koalicionit VLEN, Fatmir Limani, ka bërë thirrje për reflektim të thellë brenda koalicionit, duke theksuar se vetëm meritokracia dhe standardet etike mund ta ruajnë dhe forcojnë besimin e qytetarëve. Në një reagim publik, Limani thekson se besimi qytetar nuk ndërtohet përmes posteve, pazareve politike apo emërimeve selektive, por përmes punës, përgjegjësisë dhe respektit real për kontributin e çdo individi. Sipas tij, shoqëria është e lodhur nga praktikat përjashtuese dhe nga një kulturë politike që shpërblen afërsinë partiake në vend të vlerës profesionale. Ai nënvizon se qytetarët, veçanërisht të rinjtë dhe familjet që kanë mbështetur VLEN-in, presin një model të ri qeverisjeje, ku meritokracia të mos mbetet vetëm slogan elektoral, por të shndërrohet në praktikë të përditshme institucionale. Limani thekson se ndryshimi i vërtetë kërkon rregulla dhe standarde të qarta, duke renditur tri shtylla themelore mbi të cilat, sipas tij, duhet të mbështetet veprimi politik: transparencë radikale në proceset e punësimit dhe avancimit, llogaridhënie përmes performancës dhe hapje ndaj ekselencës dhe talentit, veçanërisht të rinjve. Duke folur nga pozicioni i tij institucional, Limani vlerëson se mungesa e drejtësisë ka pasoja të drejtpërdrejta sociale, duke ndikuar në emigrimin e të rinjve dhe humbjen e besimit të familjeve në të ardhmen. Ai thekson se politikat që po ndërtohen në resorin që drejton bazohen në vlera familjare, përgjegjësi morale dhe drejtësi shoqërore. Në reagimin e tij, Limani paralajmëron se përjashtimi i kontributorëve që ndërtuan bashkimin e VLEN-it, lufta e brendshme për pozita dhe hapja e dyerve për figura që më herët e kanë kundërshtuar koalicionin, mund të jenë fatale dhe të çojnë në zhgënjimin e votuesve. Sipas tij, veprimi politik mbi logjikën e interesit afatshkurtër dhe përfitimeve momentale rrezikon seriozisht unitetin dhe të ardhmen e VLEN-it, duke theksuar se politika duhet të zhvillohet mbi bazë morali dhe vlerash. Në fund, Limani bën thirrje të drejtpërdrejtë për përgjegjësi, duke kërkuar respekt për kontributin e çdo individi, vendosjen e përgjegjësisë mbi privilegjin, mbrojtjen e vlerave familjare dhe ndërtimin e institucioneve ku puna dhe rezultatet flasin më fort se fjalët. “Vetëm duke qenë shembull i meritokracisë, ndershmërisë dhe respektit njerëzor, VLEN mund të jetë një alternativë reale dhe e besueshme për qytetarët”, përfundon Limani.
Fatmir Limani: Meritokracia është prova e vetme e besimit qytetar për VLEN-in
