Presidenti amerikan Donald Trump bëri me dije se bisedimet mes Rusisë dhe Ukrainës po vazhdojnë, por pranoi se tensionet e thella midis dy palëve e kanë vështirësuar përparimin.
“Bisedimet po vazhdojnë. Unë them se, e dini, ka urrejtje të jashtëzakonshme midis këtyre dy udhëheqësve, midis presidentit rus Vladimir Putin dhe presidentit ukrainas Volodymyr Zelensky, urrejtje e jashtëzakonshme. Ne po flasim. Bisedimet po shkojnë mirë”, tha Trump.
Në përfundim të raundit të së dielës, Uashingtoni propozoi takimin e parë kokë më kokë mes përfaqësuesve të Rusisë dhe Ukrainës.
Duke njoftuar lajmin, presidenti Volodymyr Zelensky u shpreh skeptik nëse Moska dëshiron vërtet t’i japë fund luftës. Kjo, pasi deri më sot Kremlini i ka refuzuar bisedimet trepalëshe.
Propozimi për një takim trepalësh në nivel këshilltarësh erdhi në përfundim të takimit mes të dërguarve amerikanë dhe atyre rusë në Majemi.
Takimet ishin pjesë e përpjekjeve të kreut të Shtëpisë së Bardhë për t’i dhënë fund luftës.Javen e kaluar u mbajten gjithashtu bisedime mes zyrtarëve ukrainas dhe atyre evropianë në Berlin.
