Koalicioni VLEN ka bërë sonte hapjen e Shtabeve në Gostivar dhe Vrapçisht për zgjedhjet lokale të 11 janarit.
Me këtë rast janë zgjedhur edhe shefat e shtabeve, ku Bahar Aliu është caktuar për Gostivar, ndërsa për Vrapçisht Bunjamin Kadriu.
Shefi i shtabit qendror të VLEN-it, Adnan Azizi, gjatë këtij aktiviteti të rëndësishëm, ka vlerësuar lartë kandidaturat e Nevzat Bejtës dhe Zulhajrat Demirit.
“Hera e fundit që është punuar në Gostivar ka qenë koha e Nevzat Bejtës. Qytetarët e Gostivarit e dinë mirë këtë. Është koha që të kthehet dhe t’i rregullojë krejt ato që i shkatërruan këta të tjerët”, ka theksuar Azizi, ku sipas tij fryma fituese u ndje fuqishëm edhe në Vrapçisht.
Sipas Azizit, opozita nuk e ka hallin e Gostivarit dhe gostivarasve.
“Ata nuk garojnë për të bë punë për Gostivarin. Atyre iu duhet Gostivari për mbijetesë politike, për ta shpëtuar karrierën personale dhe për ta financuar partinë. Gostivari sot ka nevojë për siguri politike, për stabilitet, për një dorë të provuar, jo për eksperimente, jo për improvizime dhe jo për njerëz që e shohin qytetin si shpëtim politik”, ka theksuar Azizi.
