Zëvendëskryeministri i ngarkuar për politikat e qeverisjes së mirë, Arben Fetai, ju drejtua të pranishmive në ceremoninë solemne të organizuar nga Universiteti “Nënë Tereza” në Shkup, me rastin e 9-vjetorit të fillimit të punës së këtij universiteti. Ceremonia u zhvillua në Teatrin Shqiptar në Shkup dhe u ndoq nga studentë, profesorë, akademikë, përfaqësues të qeverisë dhe miqtë e universitetit.
Në fjalimin e tij, Zëvendëskryeministri Fetai theksoi se Universiteti “Nënë Tereza” nuk është thjesht një institucion arsimor, por “triumfi i një ideje, konkretizimi i një aspirate historike dhe testamenti më i çmuar që u lëmë brezave që vijnë”.
Fetai foli me krenari për angazhimin konkret të Qeverisë në mbështetjen e arsimit, duke përmendur se pas shumë vitesh pritjeje po ndërtohet Shkolla e Mesme – Gjimnazi “Sami Frashëri” në Kumanovë, zgjidhja e statusit ligjor i Medresesë “Isa Beu” duke garantuar njohjen zyrtare të diplomave për gjeneratat e të rinjve nxënësish, rritja e pagave në arsim si dhe shpërndarja në çdo shkollë e Abetares së unifikuar të gjuhës shqipe.
Ai shtoi se për kampusin e Universitetit “Nënë Tereza” është ndarë një buxhet kapital prej 34.5 milionë euro, ndërsa është rritur edhe buxheti për Universitetin e Tetovës. Po ashtu, në ditët në vijim do të nënshkruhet Memorandumi i Mirëkuptimit me Kabinetin e tij për të ofruar praktikë pune studentëve dhe për të përfshirë stafin akademik në projekte qeveritare.
Ai përfundoi me mesazhin: “Atje ku ka universitete të fortë, ka shoqëri të lirë; atje ku ka dije, ka të ardhme.”
Gjatë ceremonisë u nda edhe titulli Doctor Honoris Causa për Akademikun Alajdin Abazi, si dhe për herë të parë Plaketat e Nderit “Nënë Tereza” në fushat e shkencës, arsimit dhe kontributit në komunitet.
Ceremonia u cilësua nga të pranishmit si një ditë feste dhe krenarie për arsimin shqip në Maqedoninë e Veriut.
Fetai: UNT triumf i një ideje, konkretizimi i një aspirate historike dhe testamenti më i çmuar që u lëmë brezave që vijnë
