Iniciativa qytetare “Për një Maqedoni më të Pastër” ka iniciuar futjen e detektimit dhe ndëshkimit automatik të hedhjes së bishtave të cigareve dhe mbeturinave nga automjetet përmes sistemit “Safe City”, me qëllim uljen e ndotjes dhe rritjen e vetëdijes publike ekologjike.
Nga iniciativa theksojnë se hedhja e bishtave të cigareve dhe e mbeturinave nga automjetet prej vitesh përbën një problem serioz në vend, si nga aspekti i ndotjes, ashtu edhe nga ai i sigurisë publike. Sipas tyre, vendosja e sanksioneve automatike do të sjellë ndryshim të shpejtë të zakoneve te qytetarët, gjë që konfirmohet edhe nga shumë studime ndërkombëtare.
“Ky është një ndryshim i vogël sistemor, por me përfitime të mëdha. Kur shkeljet detektohen dhe sanksionohen automatikisht, qytetarët e ndryshojnë sjelljen shumë më shpejt”, thonë nga “Për një Maqedoni më të Pastër”.
Iniciativa thekson se sistemi “Safe City” tashmë funksionon në fazë testuese dhe me sukses detekton shkelje në trafik si kalimi në dritë të kuqe, parkimi i parregullt, mosvendosja e rripit të sigurisë, përdorimi i telefonit mobil dhe tejkalimi i shpejtësisë. Sipas tyre, nga ana teknologjike është e mundur që sistemi të përmirësohet me një algoritëm për njohjen e hedhjes së objekteve nga automjeti – praktikë që tashmë zbatohet në disa qytete evropiane.
Nga “Për një Maqedoni më të Pastër” theksojnë se bishtat e cigareve janë lloji më i shpeshtë i mbeturinave në rrugë, trotuare dhe përgjatë akseve rrugore. Një bisht cigaresh përmban substanca toksike si nikotina, plumbi dhe arseniku, ndërsa për t’u shpërbërë plotësisht i nevojiten deri në 10 vjet. Për më tepër, fijet mikroplastike nga filtrat përfundojnë në tokë dhe ujëra, duke shkaktuar ndotje afatgjatë.
Theksohet veçanërisht edhe rreziku nga zjarret. Hedhja e bishtave të cigareve nga automjetet, sidomos gjatë lëvizjes, mund të shkaktojë zjarre serioze pyjore, të cilat çdo vit shkaktojnë dëme të mëdha ndaj natyrës, pronës dhe sigurisë së qytetarëve.
“Hedhja e mbeturinave nga automjetet krijon pamje të çrregullt dhe sjellje të papërgjegjshme. Kjo lë përshtypje negative te turistët dhe ndikon drejtpërdrejt në cilësinë e jetës në qytete”, shtojnë nga iniciativa.
Sipas tyre, vendosja e detektimit dhe ndëshkimit automatik do të kontribuojë në uljen e ndotjes, zvogëlimin e numrit të zjarreve, rritjen e disiplinës në trafik dhe zhvillimin e një shoqërie më të përgjegjshme dhe moderne.
“Qëllimi nuk është vetëm ndëshkimi, por krijimi i një zakoni, kulture dhe vetëdijeje se hapësira publike është përgjegjësi e përbashkët”, porosisin nga iniciativa “Për një Maqedoni më të Pastër”.
