Kandidati për kryetar të komunës së Gostivarit nga VLEN, Nevzat Bejta në “Click plus” në TV21 ka thënë se për zgjedhjet lokale më 11 janar garon për ta ndërprerë shkatërrimin e mëtejshëm të Gostivarit nën udhëheqjen e Arben Taravarit.
Më kërkojnë qytetarët, sepse do bëjë shumë punë të mëdha, u shpreh ai.
“Numri 1 do të thotë se më 11 janar do të kemi fitore të madhe në Gostivar. Falënderoj koalicionin VLEN dhe qytetarët që më kanë mbështetur në kandidaturën time për të ndërprerë shkatërrimin e Gostivarit. Asnjëherë nuk jam shkëputur nga votuesi, bëj takime të rregullta nga mëngjesi deri në mbrëmje dhe presim me padurim fitoren më 11 janar”, ka thënë Bejta, duke shtuar se do përgjigjen të gjithë ata që e kanë shkatërruar buxhetin e komunës së Gostivarit.
Nuk nxjerr asnjë nga puna
Bejta ka zbardhur edhe një herë borxhin që ka komuna e Gostivarit që është rreth 30 milionë euro, ndërsa shton se nuk do të nxjerr asnjë nga puna, sepse ata i mbron ligji.
“Me kontratë janë mbi 150 veta, për 8 vite vetëm për ngarkimin e komunës me punëtorë që kanë ndenjur në shtëpi janë harxhuar mbi 10 milionë euro. Prandaj komuna është në borxh afër 30 milionë euro dhe kanë dështuar me projektet”, tha Bejta.
Ai shton se edhe në Vrapçisht do të ndodhë ndryshimi, ku kandidati i mbështetur nga VLEN do të ketë një fitore të madhe.
