Gjatë vitit 2024 në Lotarinë Shtetërore ka ndodhur masakër financiare. Kjo mund të konstatohet nga raporti i Entit Shtetëror të Revizionit (ESHR), i cili shpreh dyshime për parregullsi dhe keqpërdorime të mëdha në punën financiare të institucionit me të cilin deri në gusht të vitit 2024 ka udhëhequr Përparim Bajrami, ndërsa prej gushtit deri në dhjetor, Aleksandar Klimovski. Për këtë, Revizioni përmbahet të jep mendim për realitetin dhe objektivitetin e raporteve financiare, ndërsa ka shprehur mendim të pafavorshëm për harmonizimin me rregullativën ligjore.
“Në regjistra janë konstatuar evidentime joreale dhe jo të arsyetueshme për transaksione të palogjikshme për disa baza, në vlerë të përgjithshme prej rreth 2 milionë euro, për çka ekziston dyshim për keqpërdorim të financave në fjalë”, njoftojnë nga Enti Shtetëror i Revizionit.
Lotaria Shtetërore gjatë vitit 2024 ka qenë edhe fole për 75 persona që kanë marrë rroga pa shkuar në punë.
“75 persona me kontratë në vepër fare nuk kanë ardhur në punë dhe nuk i kanë kryer detyrat e punës. Për personat e angazhuar që nuk kanë ardhur në punë, në mënyrë të paligjshme për vitin 2024 u janë paguar mbi 240 mijë euro”, thonë nga Enti Shtetëror i Revizionit.
Parregullsi është konstatuar edhe me furnizimin e pajisjeve të shumta elektronike në vlerë prej 430 mijë eurosh pa dokumente përkatëse. Kompjuterë, televizorë telefonë, GPS, kamera sigurie e të tjera janë paguar më shtrenjtë se sa vlera e tyre, duke u bazuar në performancat teknike. Plotësisht, mungojnë pajisje në vlerë prej 60 mijë eurosh.
Gjithashtu, Revizioni ka konstatuar parregullsi edhe për marrjen e objekteve me qira, rikonstruimin e tyre dhe rinovimin. Mbi këtë bazë gjatë vitit 2024 janë paguar mbi 1.1 milion euro, ndërsa disa prej objekteve fare nuk janë shfrytëzuar. Plotësisht prona nuk është siguruar. Dyshime, revizorët kanë shprehur edhe realizimin e shërbimeve të marketingut, ku janë dhënë para për emisione, por për disa prej tyre nuk ka dëshmi se janë realizuar.
Fotografitë që po i shihni janë të një ngjarjes “Fan Zona Euro 2024”. Për këtë ngjarje janë shpenzuar 230 mijë euro, megjithatë ka dyshime se janë keqpërdorur. Parregullsi ka pasur edhe në pjesën e udhëtimeve zyrtare, janë shpenzuar mbi 50 mijë euro për udhëtime që nuk janë realizuar. Parregullsi të ngjashme janë konstatuar edhe në shpenzimet për mirëmbajtjen e veturave derivateve. Për këto dhe keqpërdorimet e tjera, Enti i Revizionit e ka njoftuar Prokurorinë dhe Policinë Financiare. /Alsat.mk
