Kandidati i koalicionit VLEN për komunën e Gostivarit, Nevzat Bejta, deklaroi se rikthimi i tij erdhi si rezultat i kërkesës së shumicës së qytetarëve të Gostivarit.
Duke folur sonte në emisionin “Debat në SHENJA”, Bejta theksoi se mbështetja për kandidaturën e tij ka qenë gjithëpërfshirëse, pa dallime politike apo etnike.
“Mua më rikthyen qytetarët e mi. Ishte kërkesë e shumicës së qytetarëve të Gostivarit, pa dallim se cilës parti politike i përkasin apo cilit nacionalitet i takojnë. Gostivari është i të gjithë qytetarëve. Të gjithë e duan qytetin e tyre dhe duan ta shohin sa më të bukur”, u shpreh Bejta.
“Në periudhën e kaluar, për tetë vjet, qyteti i Gostivarit u shkatërrua. U dëmtua arsimi, qyteti u mbush me mbeturina, higjiena është në nivel shumë të ulët, ndërsa urbanizmi dhe kultura janë lënë pas dore”, tha Bejta.
Sipas tij, anketimet e realizuara në terren kanë treguar se ai gëzon mbështetje të gjerë në Gostivar, çka ka ndikuar edhe në vendimin e liderëve të VLEN-it për ta mbështetur kandidaturën e tij.
“Anketimet treguan se jam fitues në qytetin e Gostivarit dhe në këtë mënyrë fitova edhe mbështetjen e liderëve të VLEN-it”, përfundoi Bejta.
