Brenda disa muaj, për herë të tetë Gjimnazi i Tetovës “Kiril Pejçinoviç”, kërcënohet me bombë, të cilat, deri më tani, të gjitha këto alarme kanë rezultuar të rrejshme. Kjo situatë është bërë e padurueshme dhe nxënësit vendosën të protestojnë para policisë së Tetovës, duke kërkuar që të kapen autorët e këtyre mesazheve shqetësuese dhe mësimi të vazhdojë pa pengesa. Nxënësit janë shprehur se dëmi më i madh u shkaktohet atyre me mosmbajtjen e orëve të mësimit.
“Si rrjedhojë e pakënaqësisë sonë me dukuritë e bombave të shpeshta, dukuri që ka ndodhur tetë herë në shkollën tonë dhe që paraqet një indikator të rënies së mbarëvajtjes së mësimit, respektivisht nuk mbahet mësim, dhe me mosmbajtjen e mësimit dëmi më i madh bie mbi faktorin nxënës, gjë që nuk është e pranueshme nga ana jonë. Kërkojmë nga organet komplete të merren masa të menjëhershme dhe serioze për mbarëvajtjen afatgjate të mësimit dhe jo përsëritjen e këtyre dukurive”, thotë një nxënës i Gjimnazit “Kiril Pejçinoviç”.
Edhe nxënësit tjerë janë shprehur të lodhur nga humbja orëve dhe mosmarrja e masave për kapjen e autorëve.
“Për alarmet e bombave që bëhen në gjimnazin e Tetovës , vërtete na kanë lodhur. Është hera e shtatë ose tetë dhe situata ka eskaluar. Na kanë lodhë me këtë çfarë bëhet në gjimnazin e Tetovës”, thotë një nxënës tjetër.
Ndërsa për drejtorin e gjimnazit, Jeton Kamberi, është e papranueshme që policia asnjëherë nuk merr përgjegjësi, pasi që sipas tij, edhe pas kontrolleve që kryhen, policia i ka thënë drejtorit se është në përgjegjësinë e tij nëse do vazhdohet mësimin apo do ndërpritet. Ai kërkon që të merren masa që procesi mos ndërpritet.
“Është e padurueshme. Kjo është e pa tolerueshme, nuk kemi asnjë përgjigje nga Ministria e Punëve të Brendshme dhe SPB Tetovë. Edhe pse policia vjen dhe e bën punën e vet, megjithatë njerëzit që duhet të vijnë komplet të antiterrorit nuk vijnë edhe neve na lënë përgjegjësinë. Pasi e kryen aspektin protkollar që nuk korrespondon me aspektin profesional, edhe të vetmen përgjigje që na japin mua si drejtor, se e keni ju përgjegjësinë a do i leni nxënësit brenda a nuk do i leni. Nuk ka mundësi që unë të marr përsipër 1400 nxënës t’i fus brenda kur vetë organi kompetent nuk e merr atë përgjegjësi”, thotë drejtori Kamberi.
Gjimnazi i Tetovës nuk është institucioni i vetëm në Tetovë që ka pasur alarme për bomba, por këtë vit në këtë gjimnaz bombat kanë qenë më të shpeshta, ndërsa sipas informacioneve zyrtare, tashmë kërcënimet nuk shkojnë në e-mailin e shkollave, por në adresë të Ministrisë së Punëve të Brendshme. Nga drejtoria protestën dhe bojkotin e mësimit e kanë paralajmëruar javë më parë duke thënë se alarmi për bomba të rrejshme dhe mosmarrja e përgjegjësisë nga ana e MPB-së ka bërë që mësimi të ndërpritet thuaj se çdo javë. (koha.mk)
