Kryetari i Qytetit të Shkupit, Orce Gjorgjievski, u bëri thirrje banorëve të Shkupit që të vijnë në sheshin “Maqedonia” dhe të marrin pjesë aktive në zbukurimin e Qytetit të Shkupit, por edhe në manifestimet e shumta, të cilat janë organizuar, e të cilat do të fillojnë që nga data 27 dhjetor dhe do të zgjasin deri më datë 1 janar. Sipas tij, pema e Vitit të Ri dhe ndriçimi festiv i Shkupit do të ndizen sonte dhe autoritetet e qytetit paralajmërojnë argëtim, muzikë dhe surpriza për të gjitha brezat në sheshin “Maqedonia”. Programi është planifikuar të fillojë në orën 18:00, kur do të fillojnë zyrtarisht festimet e Vitit të Ri dhe Krishtlindjeve në kryeqytet, për çka Qyteti i Shkupit ka ndarë një buxhet diku rreth 70 mijë euro.
“Për herë të parë dhe pas disa viteve stagnim të Qytetit të Shkupit, në mënyrë festive po e fillojmë tregimin festiv me ceremoni, aktin e ndriçimit të Qytetit të Shkupit, si në shembullin e metropoleve më të mëdha evropiane. Sonte në ora 18:00 në mënyrë zyrtare do ta ndriçojmë dhe do ta zbukurojmë pemën e Vitit të Ri. Në periudhën nga 15 deri më 31 dhjetor, çdo ditë nga ora 18:00 do të mund të argëtoheni me një program festiv për të gjithë gjeneratat.”, – deklaroi kryetari i Qytetit të Shkupit, Orce Gjorgjievski.
Por, në pyetjen se a është paraparë gjatë natës së ndërrimit të vitit ndonjë artist apo këngë shqipe, Gjorgjievski tha se jo, por do të ketë vetëm gjatë ditëve të festave tek blloku i fëmijëve.
“Mendoj se do të ketë, tek pjesa e fëmijëve, grupe të cilët do të interpretojnë apo do të luajnë në gjuhën shqipe, por në mënyrë gjenerale nga grupet të cilat do të jenë në natën festive nuk ka asgjë shqipe, por vetëm tek pjesa e fëmijëve.”, – theksoi kryetari i Qytetit të Shkupit, Orce Gjorgjievski.
Sipas tij, argëtimi e muzika nuk njohin ndarje fetare apo kombëtare. Ai po ashtu potencoi se i gjithë manifestimi është i organizuar në bashkëpunim me Lotarinë e Maqedonisë.
