Selvije Jao, bashkëshortja e Shpat Kasapit ka rikthyer në profilin e saj një foto të vjetër me këngëtarin e ndjerë, një imazh që më herët e kishte fshirë në kohën kur marrëdhënia e tyre ndodhej në krizë.
Në foto shfaqen çifti së bashku bashku me djalin e tyre, Roelin, në ditëlindjen e tij të dytë, 20 Janar 2024.
“E le Roelin jetim, nuk prite të të thërriste babi”, reagon bashkëshortja e Shpat Kasapit:
Përveç rikthimit të imazhit, Selvije Jao ka ndryshuar edhe mbishkrimin shoqërues, duke ndarë një mesazh prekës për të birin pas humbjes së këngëtarit.
“P.S. 05.12.2025 Babi do jetë engjëlli jonë mbrojtës deri sa Xheneti të na bashkojë, inshallah”, ka shkruar ajo.
Në ditën e ndarjes papritur nga jeta të artistit, Selvije Jao zbuloi se këngëtari kishte vdekur në krahët e saj, gjatë një udhëtimi në Itali.
Reagimi i Selvije Jao:
“Ndërrove jetë në krahët e mi o jetë…Sa të lumtur ishim që më në fund Roelit po i bëheshin dokumentet në Itali, që të mund ta çonim sa më shpejt tek logopedët më të mirë. Aa jemi lodhur, sa jemi stresuar…dhe askush nuk e di,” shkruan ajo. “Sa të afërt kemi qenë, sa bashkëpunues në privatësinë tonë, duke shijuar rritjen dhe zhvillimin e Roelit. Nuk prite ta dëgjoje duke të thirrur ‘babi’…nuk prite, Shpat. Nxitove dhe na le këtu vetëm, pa ty.
E le Roelin jetim, o Shpat…Në kohën kur më së shumti kishte nevojë për ty. Në kohën kur duart e tua i duheshin më shumë se kurrë. Si t’ia shpjegoj Roelit që babi nuk është më? Më thoje gjithmonë se do të më doje derisa vdekja të na ndante…por pse u ndave nga jeta në krahët e mi, pse ma këpute zemrën kështu, o jetë? Inshallah takohemi në Xhenet…Allahu të deshi pranë vetes, por unë mezi pres të zgjohem nga gjumi dhe të jesh këtu për ne.”
Shpat Kasapi ndërroi jetë në Itali në moshën 40-vjeçare më 26 nëntor pas një arresti kardiak.
