Presidenti rus, Vladimir Putin tha në një intervistë se Rusia do të marrë kontrollin e plotë të rajonit ukrainas të Donbasit me forcë, nëse trupat ukrainase nuk tërhiqen, një veprim që Kievi e refuzon.
Putin dërgoi dhjetëra mijëra trupa në Ukrainë në shkurt të vitit 2022, pas tetë vitesh luftimesh midis separatistëve të mbështetur nga Rusia dhe trupave ukrainase në Donbas, i cili përbëhet nga Donetsku dhe Luhansku.
“Ose do t’i çlirojmë këto territore me forcën e armëve, ose trupat ukrainase do të largohen nga këto territore”, tha Putin për India Today përpara një vizite në New Delhi.
Ukraina thotë se nuk dëshiron t’i japë Rusisë territor që Moska nuk arriti ta fitojë në fushën e betejës dhe Presidenti ukrainas Volodymyr Zelensky ka thënë se Moska nuk do të shpërblehet për një luftë që e ka filluar vetë.
Rusia aktualisht mban 19.2% të Ukrainës, përfshirë Krimenë, të cilën e aneksoi në vitin 2014, të gjithë Luhanskun, më shumë se 80% të Donjetskut, rreth 75% të Khersonit dhe Zaporizhias, dhe pjesë të rajoneve të Kharkivit, Sumit, Mykolaivit dhe Dnipropetrovskit.
Rreth 5 mijë kilometra katrorë të Donetskut mbeten nën kontrollin ukrainas.
Në bisedimet me Shtetet e Bashkuara mbi skicën e një marrëveshjeje të mundshme paqeje për t’i dhënë fund luftës, Rusia ka thënë vazhdimisht se dëshiron kontrollin e të gjithë Donbasit dhe se Shtetet e Bashkuara duhet ta njohin jozyrtarisht kontrollin e Moskës.
Rusia i shpalli rajonet ukrainase të Luhanskut, Donjetskut, Khersonit dhe Zaporizhias pjesë të Rusisë në vitin 2022 pas referendumeve që Perëndimi dhe Kievi i kanë cilësuar si mashtruese. Shumica e vendeve i njohin rajonet si pjesë të Ukrainës.
Putini priti të martën në Kremlin të dërguarit e SHBA-së Steve Witkoff dhe Jared Kushner dhe tha se Rusia kishte pranuar disa nga propozimet e SHBA-së për Ukrainën dhe se bisedimet duhet të vazhdojnë.
Presidenti rus tha të hënën se takimi i tij me Witkoff dhe Kushner ishte “shumë i dobishëm” dhe bazohej në propozimet e diskutuara me Presidentin Donald Trump në Alaska, raportoi agjencia shtetërore e lajmeve RIA.
