Biznesmeni austriak Bernd Bergmair, ish-pronar me shumicë i një grupi të industrisë së argëtimit për të rritur, ku bën pjesë edhe faqja Pornhub, i është drejtuar Departamentit Amerikan të Thesarit lidhur me mundësinë e blerjes së aseteve ndërkombëtare të kompanisë ruse të naftës Lukoil, e cila ndodhet nën sanksione.
Shtetet e Bashkuara kanë vendosur sanksione ndaj Lukoil, prodhuesit më të madh privat të naftës në Rusi, si pjesë e presionit ndaj Moskës për t’i dhënë fund luftës në Ukrainë.
Për shkak të sanksioneve, Lukoil është detyruar të shpallë shitjen e aseteve të saj jashtë Rusisë. Disa blerës potencialë tashmë kanë kërkuar leje nga autoritetet amerikane për të nisur bisedime me kompaninë, përfshirë gjigantët e naftës Exxon Mobil dhe Chevron.
Bergmair, përmes avokatit të tij, nuk deshi të specifikojë se për cilat asete konkrete të Lukoil është i interesuar, nëse ka pasur kontakte me kompaninë ruse dhe nëse vepron i vetëm apo si pjesë e një konsorciumi investitorësh.
Interesimi për asetet ndërkombëtare të Lukoil është rritur pasi Departamenti Amerikan i Thesarit muajin e kaluar u dha kompanive leje të fillojnë bisedimet me Lukoil. Kjo leje vlen deri më 13 dhjetor, ndërsa çdo blerje eventuale do të duhet të marrë miratimin përfundimtar të Ministrisë.
Lukoil International GmbH, me seli në Vjenë, zotëron rafineri në Evropë, pjesë në fusha nafte në Kazakistan, Uzbekistan, Irak dhe Meksikë, si dhe qindra pika karburanti në mbarë botën. Vlera e këtij portofoli vlerësohet rreth 22 miliardë dollarë, sipas të dhënave të vitit 2024.
Zëdhënësi i Departamentit Amerikan të Thesarit refuzoi të komentojë nëse Bergmair tashmë ka kontaktuar institucionin.
Bergmair ka punuar në Goldman Sachs në Nju Jork si bankier investimesh gjatë viteve ’90, para se të kalonte në investime private. Ai ishte pronar me shumicë i MindGeek – kompania luksemburgase që menaxhonte Pornhub, RedTube dhe YouPorn – deri në vitin 2023, kur u ble nga një fond kanadez investimesh për një shumë të pazbuluar.
Lista e pasanikëve e gazetës britanike The Sunday Times Rich List në vitin 2021 e vlerësoi pasurinë e tij në të paktën 1.2 miliardë funte.(INA)
