Aktori dhe muzikanti sri-lankez GK Reginold lundron me një barkë peshkimi të motorizuar nëpër periferi të Kolombos, me synimin për të dërguar ushqim dhe ujë për familjet në nevojë.
Disa prej tyre, thotë Reginold, nuk kanë marrë ndihma prej ditësh, të izoluar nga fatkeqësia më e rëndë meteorologjike që ka goditur ishullin e Azisë Jugore në vitet e fundit.
Cikloni Ditwah u përplas mbi vend javën e kaluar, duke shkaktuar përmbytje dhe rrëshqitje masive të dherave. Të paktën 460 persona humbën jetën, qindra të tjerë rezultojnë të zhdukur dhe rreth 30 mijë shtëpi janë dëmtuar.
Megjithatë, kjo tragjedi ka nxitur edhe një valë solidariteti në mbarë vendin. Presidenti Anura Kumara Dissanayake e ka cilësuar situatën si “fatkeqësinë natyrore më sfiduese në historinë e Sri Lankës”.
“Arsyeja kryesore pse vendosa të bëj këtë ishte t’u siguroja të paktën një vakt,” tha Reginold për BBC-në. “Dhe jam shumë i lumtur që munda ta bëj.”
Më shumë se një milion njerëz janë prekur nga përmbytjet, ndërsa është shpallur gjendja e emergjencës.
Forcat e armatosura sri-lankeze kanë vënë në dispozicion helikopterë për operacionet e shpëtimit, ndërsa ndihmat humanitare po mbërrijnë nga qeveri dhe organizata të huaja.
Aktivistët rikthehen në vijën e parë: nga protestat në 2022 tek kuzhinat komunitare
Në lagjen Wijerama të Kolombos, aktivistët që protestuan kundër ish-presidentit Gotabaya Rajapaksa në vitin 2022 tashmë po ndihmojnë në funksionimin e një kuzhine komunitare që përgatit vakte për të prekurit nga përmbytjet.
Kriza ekonomike e tre viteve më parë, që shkaktoi mungesa të ushqimit, karburantit dhe ilaçeve, ndezi protestat masive që çuan në rrëzimin e Rajapaksës. Sot, ajo energji aktiviste është kanalizuar drejt ndihmës pas ciklonit.
“Disa vullnetarë vinin pas pune, disa bënin turne dhe të tjerë madje morën ditë pushimi për të qenë këtu,” tregon për BBC-në aktivisti i rrjeteve sociale, Sasindu Sahan Tharaka.
Ai shton se grupi i tyre u riaktivizua menjëherë sapo u përhapën lajmet për stuhinë. Sahan e konsideron kuzhinën edhe si një vazhdim të punës së tij vullnetare që nga viti 2016, kur reshjet e dendura shkaktuan përmbytje që morën 250 jetë.
Vullnetarët kanë mbledhur qindra kërkesa për ndihmë, i kanë përcjellë te autoritetet dhe kanë organizuar shpërndarjen e ushqimeve për banorët e prekur. “Çfarëdo që kërkuam, morëm më shumë se sa prisnim nga komuniteti,” thotë ai.
Mobilizim online dhe kritika politike
Në rrjetet sociale është krijuar një bazë të dhënash publike për të orientuar donacionet dhe vullnetarët, ndërsa një tjetër platformë online u tregon donatorëve kampet e ndihmës dhe nevojat më urgjente.
Shumë kompani private po organizojnë fushata për mbledhjen e ndihmave, ndërsa televizione vendase po shpërndajnë ushqime dhe produkte bazë, si sapunë dhe furça dhëmbësh.
Presidenti Dissanayake, i kritikuar për menaxhimin e përgatitjeve ndaj ciklonit, u ka bërë thirrje qytetarëve të “lënë mënjanë dallimet politike” dhe të kontribuojnë në rindërtimin e vendit.
Ndërkohë, politikanë të opozitës akuzojnë autoritetet se kanë injoruar paralajmërimet për motin, duke rënduar pasojat e fatkeqësisë. Të hënën, deputetët e opozitës braktisën seancën parlamentare, duke pretenduar se mazhoranca po kufizonte debatin mbi krizën.
Solidaritet mes rrënojave
Pavarësisht tensioneve politike, në terren mbizotëron ndjenja e unitetit ndërsa qytetarët përpiqen të rindërtojnë jetën pas përmbytjeve.
“Në fund, gëzimi që vjen nga ndihma për të shpëtuar një jetë e zbeh çdo lodhje,” shkroi Sahan në Facebook të hënën, pas orëve të gjata të punës në kuzhinën komunitare dhe qendrat e ndihmës.
“Fatkeqësitë nuk janë të reja për ne. Por empatia dhe solidariteti ynë janë më të mëdha se çdo shkatërrim që ato mund të sjellin.”
