Autoritetet po mendojnë nëse duhet të zgjatet periudha e testimit të sistemit “Safe City”. Ministri i Brendshëm, Toshkovski nuk e përjashton mundësinë që të prolongohet data e shqiptimit të gjobave dhe në vend të 1 janarit, qytetarët të fillojnë të paguajnë gjobat për shkelje nga data 1 shkurt. Poashtu nuk përjashtohet as mundësia e lëvizjes së kufirit të tolerancës. Mund të ketë tolerim deri në 10 për qind nga shpejtësia e lejuar, por kjo do të vendoset më tej.
“Ndoshta qytetarët do të vlerësojnë se ka nevojë për një muaj plus për adaptim, ndoshta do të vazhdojmë një muaj plus. Ka shembuj në Europë ku nuk ka asnjë tolerancë, siç është Zvicra, Belgjika dhe disa vende të tjera, por ka shembuj në Evropë ku ka të lejuar tolerancë në nivel të 10 për qind nga shpejtësia e fillestare që paraqet shkelje. Këtë do ta mendojmë periudhën e ardhshme, do të shohim si do ta implementojmë”, tha Pançe Toshkovski, Ministër i Punëve të Brendshme.
Ai pajtohet se sistemi “Safe City” nuk është ideal, se gjatë këtyre 24 orëve janë konstatuar mospërputhje të të dhënave faktike të procesverbalit me identitetin e atij që e ka pranuar porosinë dhe po punohet për përmirësime në këtë drejtim.
Faza e parë përfshin Shkupin, Kumanovën dhe Tetovën si dhe korridoret 8 dhe 10, por për momentin për shkak të problemeve teknike sistemi në korridoret 8 dhe 10 nuk funksionon, por pritet të rregullohet brenda dy javësh.
Toshkovski tha se qëllimi është zgjerimi në të gjithë territorin e shtetit. Poashtu po analizohet edhe mungesa e shenjave në komunikacion, Toshkovski u zotua se prioritet do t’u jepet vendosjes nëpër pikat ku ka kamera, ndërsa tha se në të ardhmen do të analizohet thellësisht çdo shenjë e vendosur në vend.
“Në të ardhmen do të bëjmë analizë të thellë dhe revizion edhe ministria e Transportit edhe MPB dhe të gjitha institucionet kompetente, tekstualisht çdo shenje të vendosur në Maqedoni. Por duke pasur parasysh nevojën për implementimin e ‘Safe City’, fillimisht jemi të fokusuar te pikat që do të jenë si pika ku do të detektohen shkeljet nga ana e kamerave”, u shpreh Pançe Toshkovski, Ministër i Punëve të Brendshme.
Toshkovski nënvizoi se nuk do të ketë qasje selektive, asnjë funksionar nuk do të përjashtohet nga sistemi dhe të gjithë që bëjnë shkelje do të dënohen. Nga sistemi “Safe City” përfshihen edhe makinat e huaja, por ato nuk mund të detyrohen të paguajnë dënimin apo t’u pengohet dalja përmes kufirit, siç është praktikë në disa shtete, por shkelësit do të paralajmërohen se nuk dot të lejohen të futen prapë në Maqedoni, nëse nuk e paguajnë dënimin.
Dënimet nga sistemi Safe City nuk do të vlejnë për makinat e ndihmës së shpejtë, ato të aksioneve operative të MPB-së apo delegacionet, gjegjësisht makinat me drita rotative funksionojnë në bazë të rregullave tjera, dhe nuk do të paguajnë dënime.
Toshkovski njoftoi se brenda 24 orëve, vetëm në Shkup, janë regjistruar 110 mijë shkelje, prej të cilave 1000 janë makina të paregjistruara, rreth 5000 kanë kaluar në semafor të kuq. 90 për qind e shkeljeve kanë të bëjnë me tejkalimin e shpejtësisë. / Alsat.mk
