Oslo dhe Kievi kanë nënshkruar një letër qëllimi për të krijuar prodhimin e dronëve ukrainas në Norvegji, me plane për të filluar prodhimin “shpejt në vitin 2026”, sipas raporteve mediatike të publikuara sot.
Bashkëpunimi synon të forcojë industritë e dronëve të të dy vendeve, duke rritur njëkohësisht sigurinë e Evropës. Pasi të prodhohen dronët, ato do t’i dhurohen Ukrainës, konfirmoi Ministria Norvegjeze e Mbrojtjes në një email drejtuar agjencisë norvegjeze të lajmeve NTB, përcjell Anadollu.
“Marrëveshja lehtëson zhvillimin dhe bashkëpunimin më të ngushtë midis industrive norvegjeze dhe ukrainase të dronëve. Pas prodhimit, këto dronë do t’i dhurohen Ukrainës”, tha Ministri i Mbrojtjes i Norvegjisë, Tore Sandvik.
“Sipas marrëveshjes që është nënshkruar, Ukraina do të ndajë teknologjinë dhe inovacionin me Norvegjinë, dhe qëllimi është të arrihet një bashkëpunim më i ngushtë dhe më i thellë me industrinë norvegjeze të mbrojtjes për të rritur kapacitetin e prodhimit dhe në këtë mënyrë sigurinë e Evropës”, shtoi ai.
Kryeministri ukrainas Denys Shmyhal tha se marrëveshja u sjell dobi të dyja palëve.
“Ukraina po ndan përvojën dhe teknologjinë e saj me Norvegjinë. Ne po fitojmë kapacitet prodhimi që do t’u sigurojë ushtarëve tanë dronë modernë. Përveç kësaj, kjo hap mundësi të reja për kërkim dhe zhvillim”, tha ai.
Projekti përfshin një cikël kërkimi dhe zhvillimi që përfshin Institutin Norvegjez të Kërkimeve të Mbrojtjes (FFI), kompanitë zhvilluese dhe prodhuesit norvegjezë të dronëve, me qeverinë që shpreson se përpjekja do të forcojë ekspertizën kombëtare.
Sekretarja e shtetit norvegjez, Marte Gerhardsen, tha për transmetuesin publik NRK, se iniciativa erdhi pas një kërkese të drejtpërdrejtë nga Ukraina.
“Presidenti ukrainas Volodymyr Zelensky na ka kërkuar ta bëjmë këtë. Ata janë në një situatë shumë të vështirë dhe është e rëndësishme që të bëjmë çmos për të ndihmuar Ukrainën tani”, tha ajo.
Gerhardsen nuk mundi të jepte një datë se kur Ukraina do të fillojë të merr dronët, por theksoi se kjo duhet të ndodhë “sa më shpejt të jetë e mundur”.
