Mijëra njerëz morën pjesë në një protestë në qendër të Madridit sot, të organizuar nga Partia Popullore (PP) konservatore e opozitës, duke kërkuar dorëheqjen e kryeministrit Pedro Sanchez pasi ish-ndihmësit e tij u arrestuan javën e kaluar nën dyshimin për korrupsion.
Nën sloganin “Mafia apo demokraci?”, protesta “Kundër korrupsionit” në qeveri u mbajt pas ndalimit të enjten të ish-ministrit të Transportit dhe ish-sekretarit të partisë qeverisëse të qendrës së majtë PSOE, Jose Luis Abalos, si dhe ish-këshilltarit të tij Koldo Garcia.
“Sançizmi është në burg dhe duhet të largohet nga qeveria”, i tha turmës kreu i partisë Alberto Nunez Feijoo. Ish-kryeministrat e partisë, Jose Maria Aznar dhe Mariano Rajoy, ishin midis tyre.
Organizatorët vlerësuan se morën pjesë 80.000 njerëz, ndërsa qeveria raportoi 40.000 protestues. “Pedro Sanchez, jep dorëheqjen!” brohoritën protestuesit, ndërsa Feijoo pretendoi se “korrupsioni është Pedro Sanchez”.
Kjo është protesta e shtatë që Feijoo ka udhëhequr kundër Sanchez që kur ai mori detyrën si president i Partisë Popullore në prill 2022. Sanchez, kreu i Partisë Socialiste të Punëtorëve Spanjolle (PSOE), ka qenë në pushtet që nga viti 2018, raporton KosovaPress.
Ai i ka kërkuar vazhdimisht falje popullit spanjoll për skandalet që e rrethojnë dhe ka thënë se nuk do të jep dorëheqjen para përfundimit të mandatit të tij në vitin 2027.
