Ministria e Punëve të Jashtme dhe Tregtisë së Jashtme e Maqedonisë së Veriut kërkon shtatë kandidatë që do të punonin në këtë institucion.
Konkursët e publikuar nga Agjencia për Administratë tregojnë se MPJ synon të plotësojë tre pozita këshilltarësh dhe katër pozita shefësh sektorësh. Megjithatë, pagat që i ofron institucioni nuk duken tërheqëse, sidomos duke pasur parasysh se këtyre personave u kërkohet arsim i lartë dhe njohuri të mira të gjuhëve të huaja.
Detajet nga konkursët zbulojnë se MPJ kërkon një bashkëpunëtor për punë administrative në sektorin për Mal të Zi, Bosnje e Hercegovinë, Kroaci dhe Slloveni; më pas një bashkëpunëtor për Politikë të Përbashkët të Jashtme dhe të Sigurisë (PBJS), si dhe një bashkëpunëtor për bashkëpunim politik e të sigurisë midis NATO-s, organizatave të tjera ndërkombëtare dhe vendeve partnere.
Personat e interesuar duhet të jenë shtetas të Maqedonisë, të përdorin gjuhën maqedonase, të jenë të rritur dhe pa dënim që ndalon ushtrimin e profesionit. Gjithashtu duhet të kenë arsim të lartë nga fusha e shkencave politike, juridike ose ekonomike, por nuk kërkohet përvojë pune në profesion. Megjithatë, kërkohet njohja e programeve kompjuterike për punë zyre, si dhe njohja e njërit prej tre gjuhëve më të përdorura në Bashkimin Evropian (anglisht, frëngjisht, gjermanisht) dhe certifikatë ndërkombëtare.
Kandidatët nuk duhet të jenë anëtarë të organeve të një partie politike në nivel republikan dhe, si dëshmi, duhet të dorëzojnë një deklaratë të noterizuar.
Paga për këto pozita arrin vetëm 32.049 denarë, ndërsa kandidatët mund të aplikojnë deri më 9 dhjetor.
Me konkursin e dytë, MPJ kërkon edhe katër persona që do të jenë shefa të sektorëve të ndryshëm. Një konkurs është për Shef të sektorit për Republikën e Shqipërisë, Republikën e Serbisë dhe Kosovën, në kuadër të sektorit për marrëdhënie bilaterale me vendet fqinje. Konkursët e tjerë janë për Shef të sektorit për çështje juridike, Shef të sektorit për bashkëpunim në kulturë dhe Shef të sektorit për digjitalizim.
Kushtet për aplikim janë të ngjashme: shtetësi e Maqedonisë, përdorim aktiv i gjuhës maqedonase, moshë madhore dhe pa ndalim për ushtrimin e profesionit. Kërkohet arsim i lartë në fushën e shkencave politike apo juridike.
Kërkohet gjithashtu përvojë prej katër vitesh në profesion ose të paktën një vit në sektorin publik. Si për pozitat paraprake, kandidatët duhet të kenë njohuri të programeve kompjuterike për punë zyre, certifikatë për provimin e administrimit, si dhe njohjen e njërit prej tre gjuhëve kryesore të BE-së me certifikatë ndërkombëtare. Nuk duhet të jenë anëtarë të një partie politike në nivel republikan, gjë që dëshmohet me deklaratë të noterizuar.
Paga për këto pozita arrin deri në 40.834 denarë.
Kandidatët duhet të kenë parasysh se, sipas Ligjit për Punët e Jashtme, një person që për herë të parë punësohet si diplomat dhe nuk ka përvojë paraprake, punësohet si praktikant. Periudha e praktikës për diplomatët zgjat një vit. Gjatë kësaj periudhe, praktikantit i paguhet 80 për qind e komponentës së pagës për vendin e punës. Nëse praktikanti nuk e kalon provimin e praktikës, i ndërpritet marrëdhënia e punës në Ministri. Gjithashtu, do të nisë procedura për lëshimin e certifikatës së sigurisë për kandidatin e përzgjedhur, por nëse certifikata nuk i jepet, marrëdhënia e punës i ndërpritet.
