Kryetari i Kuvendit, Afrim Gashi në emisionin “1+1” në TVM2 lidhur me ligjin për përfaqësim të drejtë dhe adekuat ka thënë se shumë shpejt do të kemi përgjigje nga Komisioni i Venecias dhe në momentin që do të ketë përgjigje rekomandimi do të futet në procedurë parlamentare
“Duhet ta kuptojmë se e ngrisin nivelin e përfaqësimit me këtë ligj, do të jetë ligj i mirë, ka pasur grup punues, ekspertë që kanë punuar në atë ligj. Është shumë me rëndësi që të mos e minimizojmë, sepse po bëhet një arritje shumë e madhe dhe ky parim i MO-së në vitin 2025 do të kthehet në formë të ligjit dhe do të fillojë të implementohet”, ka thënë Gashi.
Të mos bëhet politikë me Komisionin anketues
Lidhur me Komisionin anketues për rastin e Koçanit dhe ajo si Spitali modular, Besa Trans…, ai tha se kujdeset që procedura në Kuvend të bëhet në bazë të Kushtetutës dhe rregullores.
“Kemi 2 iniciativa legale ku edhe opozita dhe shumica kanë dhënë propozime, njëra ka të bëjë me gjitha rastet, tjetra për rastin e Koçanit. Të hënën do të merremi vesh që të ketë një Komision anketues, nëse nuk mund të merremi vesh do të duhet të votohet dhe dy procedurat do t’i propozoj në seancë parlamentare. Ideja është të kemi konsensus që të mos ndahen, sepse janë çështje të ndjeshme. Kam kërkuar që të mos bëhet politikë me këto raste”, ka thënë Gashi.
VLEN dhe liderët duhet ta lexojnë mesazhin e qytetarëve
Lidhur me unifikimin e VLEN në nja parti, ai tha se mesazhin politik që shqiptarët e dërguan në këto zgjedhje ishte se duan një forcë politike të bashkuar dhe të qëndrueshme.
“VLEN dhe liderët duhet ta lexojnë mesazhin e qytetarëve”, nënvizoi ai.
