Qindra qytetarë shqiptarë janë mbledhur në sheshin “Skënderbeu” nga të gjitha trevat shqiptare: Kosovë, Shqipëri, nga qytetet e Maqedonisë së Veriut, por edhe nga Mali i Zi, për të festuar 28 Nëntorin – Ditën e mëvetësimit të shtetit shqiptar, pra përvjetorin e Pavarësisë së Shqipërisë. Kjo datë historike, si çdo vit, edhe këtë vit u shënua me një koncert madhështor, ku performuan emra të njohur të estradës muzikore shqiptare. Koncerti u organizua nga Ajshe Avdiji, sportiste e garave me makinë dhe fituese e shumë çmimeve, ndërsa u mbështet nga Komuna e Çairit.
Eventi nisi me një marsh të kuajve, valltarëve, tupanxhinjve, motoristëve, veturave luksoze, karatistëve, boksierëve dhe basketbollistëve, nga godina e komunës deri në sheshin “Skënderbeu”, ku edhe u mbajt koncerti.
“Sot është një datë shumë e rëndësishme për flamurin tonë shqiptar dhe kujtojmë të gjithë ata që luftuan dhe derdhën gjak për këtë flamur. Ky event është një mesazh për të gjithë shqiptarët që të mos e harrojmë këtë ditë edhe në Maqedoninë e Veriut. Jemi mbledhur nga të gjitha trojet: Prizreni, Prishtina, Shqipëria; kemi plot mysafirë nga kudo ku ka shqiptarë.”, – deklaroi organizatorja dhe sportistja e garave me makinë, Ajshe Avdiji.
“28 Nëntori është një festë e madhe, festa e flamurit shqiptar. Erdha me ftesën e Ajshe Avdijit dhe jemi duke kaluar shumë mirë. Më vjen mirë që i shoh të gjithë shqiptarët bashkë këtu dhe jam shumë i kënaqur e i lumtur. Krejt shqiptarëve të Maqedonisë ua uroj festën e flamurit.”, – theksoi artisti nga Kosova, Sevdail Radogoshi.
“Kjo datë përfaqëson krenarinë tonë kombëtare si shqiptarë, pavarësisht se në cilat shtete jetojmë të ndarë. E kemi obligim moral dhe kombëtar që të mbështesim çdo manifestim dhe çdo ditë të veçantë që simbolizon popullin shqiptar dhe festat që lidhen me krenarinë tonë kombëtare.”, – u shpreh udhëheqësi i Klubit të Karatesë “Arion” nga Tetova, Veton Murati.
Vetura që u binin borive, flamuj që valëviteshin krenarë, pjesëmarrës me veshje kombëtare, këngë, valle dhe recitale koreografike që të kujtonin rëndësinë e kësaj dite, e gjithë kjo atmosferë krijoi një mozaik emocionesh që bashkoi shqiptarët nga të gjitha trojet.
Ky manifestim tregoi edhe një herë unitetin dhe krenarinë tonë kombëtare, duke na kujtuar se 28 Nëntori është një ndjenjë që na bashkon kudo që jemi.(TVM 2)
https://www.facebook.com/share/v/17iSbmMPTG/
