Ish-Presidenti Hashim Thaçi ka marrë fjalën në fund të konferencës së sotme për rastin ndaj tij dhe të tjerëve kundër administrimit të drejtësisë. Arsyeja ka qenë pikërisht data e caktimit të kësaj seancë, 28 Nëntori – Dita e Flamurit, për çka ka drejtuar kritika ndaj Gjykatës Speciale.
Thaçi ka thënë se mbajtje e kësaj seance me 28 Nëntor do të duhej të ishte evituar, teksa e cilësoi si befasi jo të mirë, shkruan Reporteri.net.
Ai me besim tha se nëntorët tjerë do t’i festojë bashkarisht me popullin në Kosovë.
“Është në interes që në këtë gjykatë të mos ndodhin gjëra që nuk lejohet të ndodhin në shtetet tuaja përkatëse. Si çdo popull edhe ne shqiptarët kemi historinë, traditat kombëtare e shtetërore. Mendoj se caktimi i kësaj seanca pikërisht sot më 28 nëntor do të duhej evituar. Mbajtja e kësaj seance pikërisht sot me 28 Nëntor, për mua dhe çdo shqiptar është befasi jo e mire”, deklaroi Thaçi.
Thaçi tha se arsyeja pse ndodhet në këtë seancë është sepse është i përcaktuar për respektimin e shtetit ligjor.
Mirëpo, sipas tij, një gjë e tillë nuk do të lejohej të ndodhte nëpër shtete tjera.
“I nderuar gjyqtar, sot çdo shqiptar ka festë kombëtare, shtetërore dhe familjare, sepse është festa e dinjitetit dhe krenarisë kombëtare ku si çdo popull i lirë në botë feston dhe kujton. Sot çdo familje shqiptare dhe institucion i Kosovës, edhe kujton e edhe feston. Mua nuk më mbetet tjetër, vetëm të uroj të gjithë shqiptarët për festën e 28 Nëntorit. Të festojnë të bashkuar, krenarë dhe me dinjitet. Besoj që nëntorët e tjerë do t’i festojmë bashkërisht”, tha Thaçi.
Pas fjalës së Thaçit, reagoi gjyqtari, i cili tha se konferenca për ecurinë e çështjes u caktua në konsultim me të gjitha palët dhe se s’kishte pasur kundërshtime.
“Më duhet t’ju them që këtë datë e caktuam pasi u konsultuam me të gjitha palët dhe asnjë kundërshtim nuk pati për këtë ditë”, deklaroi gjyqtari.
Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe vitin e kaluar i është ngritur aktakuza kundër administrimit të drejtësisë.
Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës./Reporteri.net
