Konvikti studentor “Pelagonia” në Shkup prej vitesh njihet si një nga objektet më të vjetra dhe më të amortizuara për studentët në vend. Edhe pse çdo muaj 950 studentë paguajnë nga 3.600 denarë për akomodim – çmim i pandryshuar që nga viti 2001 – kushtet në konvikt vazhdojnë të ngrejnë dilema serioze për cilësinë e jetesës studentore.
Videoja ku shihet një mi në një nga tualetet dhe që u përhap me shpejtësi në rrjetet sociale, e ringjalli debatin publik dhe edhe një herë e vuri nën lupë gjendjen e konvikteve shtetërore. Drejtoria pretendon se bëhet fjalë për një “rast të izoluar”, por vetë gjendja e objektit tregon se problemet janë shumë më të thella dhe shumë më të vjetra.
“Jeta në konvikt është kryesisht e mirë, ka shoqëri dhe atmosferë që të motivon të mësosh, por ndonjëherë është e vështirë kur shohim probleme që është dashur të zgjidhen prej kohësh. Është e qartë se konvikti është shumë i vjetër, duhej të ishte rinovuar shumë më herët, jo tani. Megjithatë, kushtet janë disi të pranueshme,” thotë një student i Pelagonisë, i cili preferon të mbetet anonim.
Drejtori Orhan Aliu siguron se po bëhen përpjekje dhe se borxhi është zvogëluar nga 24 në 18 milionë denarë, por studentët që takuam nuk fshehin se problemet janë shumë më të mëdha dhe se pa një rinovim të vërtetë situata vështirë se do të ndryshojë.
“Godina është e vjetër, por është e mirëmbajtur. Është planifikuar rinovim i plotë. Siç thonë të vjetrit – nga një gjyshe e vjetër nuk del një vajzë e re e bukur,” shton ai me ironi.
Drejtoria paralajmëron masa të reja: pastrim dhe funksionalizim të bodrumeve dhe depozitave, me idenë që më pas të jepen me qira për kompani si burim shtesë të ardhurash. Por mbetet e hapur pyetja nëse këto hapa, ndonëse të dobishëm, janë të mjaftueshëm për të zgjidhur problemet që zgjasin me vite.
Për studentët, rinovimi nuk është më luks, por domosdoshmëri. Dhe videoja me minj vetëm kujton atë që ata e thonë prej vitesh: se banimi i denjë studentor duhet të jetë rregull, jo përjashtim.
