I gjithë territori i vendit ka hyrë në fazën e verdhë për shkak të reshjeve të dendura të shiut, të shoqëruara herë pas here me erë të fortë jugore dhe me kushte për paraqitje të vërshimeve si rezultat i shiut të rrëmbyeshëm, i cili pritet të kapërcejë 25 litra për metër katror. Sipas hidroalarmit, pothuajse e gjithë Maqedonia e Veriut po hyn në një zonë me kushte potencialisht të rrezikshme, ku rajonet qendrore dhe lindore janë më të ekspozuara ndaj rrezikut.
“Drejtoria për Punë Hidrometeorologjike, ka dhënë njoftim paralajmërues me ngjyrë të verdhe për përmbytje të mundshme ndërsa priten shira të rrëmbyeshëm gjatë ditës së sotme dhe nesër të cilët do të jenë rreth 25 litra shi për metër katrorë në 24 orët e ardhshme por për shkak të asaj që toka është e ngopur me ujë nga shirat e mëparshëm dhe kjo është arsyeja e fazës së verdhe ku janë të mundshëm dalje të vogla të disa lumenjve”, tha Marija Cvetkovska Atanasova – Meteorolog kujdestar.
Për shkak të shirave të rrëmbyeshëm dhe erës së fortë, mbrëmë situata e rënduar meteorologjike ka shkaktuar ndërprerje të trafikut ajror në Aeroportin Ndërkombëtar të Shkupit. Shkak për këtë u bënë rrymat e fuqishme dhe të paqëndrueshme ajrore, të njohura si “wind shear”, një fenomen që paraqet rrezik serioz gjatë uljes së avionëve. Sipas informacioneve, të paktën dy fluturime nga Stambolli dhe Venecia nuk kanë arritur të aterrojnë në mënyrë të sigurt në pistën e Shkupit dhe janë drejtuar drejt aeroportit të Prishtinës. Meteorologët paralajmërojnë se kushtet e paqëndrueshme do të vazhdojnë edhe në ditët në vijim, prandaj rekomandohet planifikim i kujdesshëm i udhëtimeve dhe aktiviteteve në ambiente të hapura. /Alsat.mk
