–Emetim i ri i fletobligacionit të qytetarëve do të publikohet në gjysmën e parë të muajit dhjetor, njoftoi ministrja e Financave Gordana Dimitrieska-Koçoska në TV 24.
Ajo theksoi se detajet e emetimit të fletobligacionit të qytetarëve do të jenë të njohura pasi do të publikohet prospekti, dhe se në periudhën e kaluar ka pasur interes nga qytetarët për emetimin e këtyre fletobligacioneve.
“Në periudhën e kaluar, qytetarët vazhdimisht kanë pyetur në Ministrinë e Financave nëse do të ketë emetim të ri të fletobligacion të qytetarëve. Kjo do të thotë se në një farë mënyre kultura e investimeve te qytetarët po ndryshon dhe pres që i njëjti grup qytetarësh, që nuk është më shumë se 2.000 persona, të investojnë përsëri ndërsa kjo nuk është ndonjë vlerë e madhe”, theksoi Dimitrieska-Koçoska.
Ajo shtoi se bazuar në interesin e tillë, u analizuan edhe përvojat në Slloveni dhe Kroaci, të cilat treguan se në Slloveni nuk ka pasur absolutisht asnjë interes, por në Kroaci interesi ka qenë i jashtëzakonshëm.
Në intervistë, ministrja njoftoi se deri më tani janë plasuar 190 milionë euro nga huaja hungareze e destinuar për të mbështetur kompanitë vendase dhe se është arritur qëllimi për të mbështetur kompanitë që të investojnë dhe të vazhdojnë aktivitetet e tyre.
“Përmes numrave kemi dëshmuar se e kemi arritur objektivin. Nëse të dhënat e PBB-së tregojnë se kemi lëvizje të mëdha, nëse treguesi statistikor në ndërtimtari tregon se kemi rritje në këtë sektor, atëherë besoj se e kemi arritur qëllimin, që është të ndihmojmë sektorin privat, i cili në periudhë afatgjate do të konsideronte qëndrimin këtu për të investuar, ndërsa të mos mendohet për mbylljen dhe transferimin në vende të tjera. Përmes këtyre investimeve, ky qëllim është arritur”, theksoi ministrja.
Në lidhje me mjetet nga huaja hungareze të destinuara për përkrahje në realizimin e projekteve komunale, theksoi se deri më tani janë realizuar 21 milionë denarë në vitin 2024 dhe 2.2 miliardë denarë në vitin 2025, por sqaroi se në terren mundet që realizimi të jetë edhe më i madh dhe se kjo do të shihet në periudhën e ardhshme.
