Në disa shkolla fillore të Zagrebit, gjatë mbledhjeve të këshillave të prindërve, drejtorët kanë paralajmëruar për një fenomen të rrezikshëm që po përhapet mes nxënësve.
Bëhet fjalë për një grup WhatsApp të quajtur “Ljudeki”, ku disa fëmijë po shpërndajnë përmbajtje tejet shqetësuese.
Sipas njoftimit që një nënë mori nga përfaqësuesja e prindërve në këshillin e shkollës, në këtë grup po qarkullojnë fotografi dhe GIF-a me përmbajtje seksuale eksplicite, simbole naziste dhe imazhe të trupave njerëzorë të copëtua, raporton Dnevnik.hr.
Drejtuesit e shkollave u kanë bërë thirrje prindërve të jenë të kujdesshëm, duke theksuar se fëmijët e kësaj moshe nuk mund të përballojnë përmbajtje kaq traumatike.
Shkollat kanë paralajmëruar gjithashtu punë shtesë me nxënësit për të adresuar këtë problem.
“Ishte e tmerrshme”
“Fëmija im është në klasat e ulëta dhe ende nuk ka telefon, kështu që fatmirësisht nuk ka kontakt me këtë përmbajtje. Por rreziku është i madh për fëmijët më të rritur që përdorin WhatsApp,” ka thënë nëna që pranoi njoftimin.
Ajo theksoi se lajmi e ka tronditur dhe se është e nevojshme të informohen të gjithë prindërit.
Sipas saj, disa drejtorë shkollash janë të njohur me rastin dhe prindërit janë ndier të shqetësuar.
“Në WhatsApp ka opsione për të raportuar përmbajtje të papërshtatshme, por prindërit duhet të dinë si t’i përdorin,” shtoi ajo.
