Ditëve të fundit është vërejtur një rritje e dukshme e rasteve me viruse. Më të shpeshtat janë infeksionet e traktit respirator, si dhe rastet me Kovid 19.
Këto infeksione po prekin të gjitha grupmoshat pa përjashtim, ndërsa vetëm në ambulanca regjistrohen mbi 30 kontrolle në ditë. Edhe kapacitetet spitalore janë të mbingarkuara. Tek fëmijët po vërehet gjithashtu një përhapje e Variçellës.
“Në bashkëpunim dhe në koordinim me spitalet e shohim se të gjitha kapacitetet spitalore janë të mbushura, nëpër çerdhe ka infeksione të mjaftueshme, për momentin më e theksuar është variçella tek fëmijët. Duhet që të mos dilet pa nevojë të mos bëhen grumbuj personash në hapësira të mbyllura, më pas duhet të konsumohen vitamine”, tha Lupço Stefanovski, mjek amë.
Mjeku Lupço Stefanoski thotë se për sëmundjet e mushkërive ndikon jashtë mase edhe ajri i ndotur, sidomos tek sëmurit kronik dhe të moshuarit, të cilët duhet në kohë ta marrin terapinë e nevojshme.
“Ajri i ndotur ka një ndikim të madh të përqindjes së madhe që njerëzit sëmuren sidomos ato që janë me sëmundje kronike, sidomos astma bronkiale, astma alergjike, sëmundjet pulmonare kronike, dhe duhet të intervenohet me terapinë simptomatike pasi të moshuarit dhe të sëmurit kronik duhet ti mbrojmë që të mos arrihet në ndonjë përkeqësim”, shtoi Lupço Stefanovski, mjek amë.
Mjekët u bëjnë apel qytetarëve të tregojnë kujdes të shtuar gjatë kësaj periudhe, të ndjekin rekomandimet shëndetësore dhe të paraqiten te mjeku sapo të shfaqin simptoma, për të parandaluar komplikimet dhe përhapjen e mëtejshme të infeksioneve.
